نائب وزیراعظم و وزیر خارجہ سینیٹر اسحاق ڈار کی زیر صدارت میڈیکل، ڈینٹسٹری اور متبادل طب کے تعلیمی اداروں کی منظوری سے متعلق کمیٹی کا اجلاس منعقد ہوا۔
اجلاس میں متعلقہ قوانین کے تحت میڈیکل، ڈینٹسٹری اور متبادل طب کے تعلیمی اداروں کی منظوری سے متعلق مختلف کیسز کا تفصیلی جائزہ لیا گیا اور ان کی جانچ پڑتال کی گئی۔
نائب وزیراعظم نے اجلاس میں معیارِ تعلیم کو یقینی بنانے اور بین الاقوامی معیار کے تقاضوں پر مکمل عملدرآمد کی اہمیت پر زور دیا۔
کمیٹی نے اس بات کا بھی اعادہ کیا کہ بیرون ملک میڈیکل تعلیم حاصل کرنے کے خواہشمند پاکستانی طلبہ کو پاکستان میڈیکل اینڈ ڈینٹل کونسل کے مقررہ طریقہ کار کے تحت پہلے سے رجسٹریشن لازمی کروانی ہوگی تاکہ مستقبل میں کسی بھی قسم کی مشکلات سے بچا جا سکے۔
اجلاس میں وفاقی وزیر برائے قومی صحت خدمات و ضوابط، وزیر قانون و انصاف، وزیراعظم کے معاون خصوصی طارق باجوہ، سیکریٹری صحت، سیکریٹری تعلیم اور متعلقہ وزارتوں و اداروں کے سینیئر حکام نے شرکت کی۔
