وزیراعظم شہباز شریف کی سفارش پر صدرِ پاکستان نے کوہاٹ کے قریب دہشتگردی کا بڑا منصوبہ ناکام بنانے والے بہادر شہری لیاقت شہید ولد کریم الٰہی کے لیے ’ستارۂ شجاعت‘ کی منظوری دے دی ہے۔ ستارۂ شجاعت پاکستان کا دوسرا بڑا سول اعزاز برائے بہادری تصور کیا جاتا ہے۔
مزید پڑھیں: مون سون سے قبل پیشگی تیاری یقینی بنائی جائے، وزیراعظم شہباز شریف کی ہدایت
وزیراعظم شہباز شریف نے اپنے بیان میں کہا کہ لیاقت شہید نے ایک ذمہ دار شہری ہونے کا ثبوت دیتے ہوئے مشتبہ شخص کو روک کر اس کی شناخت پوچھی، جس پر دہشتگرد نے خود کو دھماکے سے اڑا لیا۔ اس واقعے میں لیاقت شہید نے جامِ شہادت نوش کیا، تاہم ان کی بروقت بہادری نے بڑے جانی نقصان کو روک دیا۔
President Asif Ali Zardari paid tribute to brave citizen Liaqat, who embraced martyrdom while preventing a terrorist near Jand. He directed Governor Punjab & Interior Minister to trace the family & convey the nation’s respect & solidarity.
— The President of Pakistan (@PresOfPakistan) May 12, 2026
وزیراعظم نے کہا کہ شہید لیاقت کی لازوال قربانی ہمیشہ یاد رکھی جائے گی۔ انہوں نے غیر معمولی جرأت، فرض شناسی اور حب الوطنی کی اعلیٰ مثال قائم کی۔ ایسے نڈر شہری دہشتگردی کے خلاف قومی عزم کی حقیقی علامت ہیں۔
یاد رہے کہ گزشتہ روز پنجاب اور خیبرپختونخوا کے بین الصوبائی علاقے جنڈ اور خوشحال گڑھ پل، کوہاٹ کے قریب ایک دہشتگرد حساس چیک پوسٹ کی جانب بڑھ رہا تھا، تاہم لیاقت شہید نے بروقت مزاحمت کرکے نہ صرف چیک پوسٹ بلکہ اردگرد موجود متعدد شہریوں کی جانیں بھی بچائیں۔ حملہ آور دھماکے میں ہلاک ہوگیا جبکہ لیاقت شہید موقع پر جان کی بازی ہار گئے۔
مزید پڑھیں:وزیراعظم شہباز شریف سے بلوچستان کے سیاستدانوں کی ملاقات، صوبے کی ترقی پر تبادلہ خیال
دوسری جانب لیاقت شہید کے اہل خانہ ستارۂ شجاعت وصول کرنے کے لیے اسلام آباد روانہ ہو گئے ہیں۔ شہید کی والدہ، صاحبزادے اور بھائی صدرِ پاکستان سے یہ اعزاز وصول کریں گے۔
ذرائع کے مطابق شہید کے اہلخانہ کو مکمل سرکاری پروٹوکول کے ساتھ اسلام آباد بھیجا گیا ہے جبکہ اسسٹنٹ کمشنر جنڈ بھی ان کے ہمراہ موجود ہیں۔ اہلخانہ کی حفاظت اور سہولت کے لیے ایلیٹ فورس کا خصوصی دستہ بھی ساتھ روانہ کیا گیا ہے۔
