سلہٹ ٹیسٹ کے چوتھے روز کے اختتام تک پاکستان نے بنگلہ دیش کے 437 رنز کے ہدف کے تعاقب میں 7 وکٹوں کے نقصان پر 316 رنز بنا لیے۔
پاکستانی ٹیم کو ابتدا میں مشکلات کا سامنا کرنا پڑا اور پہلی وکٹ 27 رنز پر گری جب عبداللّٰہ فضل 6 رنز بنا کر آؤٹ ہوئے۔ اس کے بعد اذان اویس بھی 21 رنز بنا کر پویلین لوٹ گئے اور ٹیم کا مجموعی اسکور 41 رنز ہوگیا۔
ابتدائی 2 وکٹیں جلد گرنے کے بعد کپتان شان مسعود اور بابر اعظم نے ذمہ دارانہ شراکت قائم کی اور اسکور کو 133 تک پہنچایا۔
بابر اعظم 47 رنز بنانے کے بعد آؤٹ ہوئے جبکہ سعود شکیل صرف 6 رنز بنا سکے۔
پاکستان کا مجموعہ 162 رنز تک پہنچا تو کپتان شان مسعود 71 رنز کی عمدہ اننگز کھیل کر وکٹ گنوا بیٹھے۔ بعد ازاں سلمان علی آغا اور محمد رضوان نے ٹیم کو سنبھالا اور اسکور 255 رنز تک پہنچایا۔
محمد رضوان نے اس دوران اپنی نصف سینچری بھی مکمل کی، ان کی اننگز میں 7 چوکے شامل رہے۔
بنگلہ دیش کی جانب سے ناہید رانا اور تیج الاسلام نے 2،2 کھلاڑیوں کو آؤٹ کیا جبکہ مہدی حسن میراز کے حصے میں ایک وکٹ آئی۔
یاد رہے کہ پاکستان اپنی پہلی اننگز میں 232 رنز پر آؤٹ ہوگیا تھا۔ میچ کے پہلے روز بنگلہ دیش کی ٹیم پہلی اننگز میں 278 رنز بنا سکی تھی جبکہ دوسری اننگز میں میزبان ٹیم نے 390 رنز اسکور کیے۔
