محکمہ داخلہ پنجاب نے پاک فضائیہ کی تمام ایئر بیسز اور کمرشل ہوائی اڈوں کے تحفظ کو یقینی بنانے کے لیے دفعہ 144 نافذ کر دی ہے۔
یہ فیصلہ انسانی جانوں اور املاک کے تحفظ اور فلائٹ آپریشنز کی سلامتی کے پیش نظر کیا گیا ہے۔
ترجمان محکمہ داخلہ پنجاب کے مطابق صوبائی سیکریٹری داخلہ نے ضابطہ فوجداری 1898 کی دفعہ 144(6) کے تحت یہ پابندیاں عائد کی ہیں۔
یہ بھی پڑھیں: ملک کے تمام ہوائی اڈے مکمل فعال ہیں، ایئرپورٹس اتھارٹی
جن کا اطلاق صوبے بھر میں تمام پاکستان ایئر فورس کے ائیر بیسز اور کمرشل ہوائی اڈوں کے اطراف 13 کلومیٹر کے دائرے میں ہوگا۔
حکم نامے کے مطابق مذکورہ علاقوں میں کبوتر بازی، لیزر لائٹس کے استعمال اور صدقے کے گوشت یا آلائشیں پھینکنے پر مکمل پابندی ہوگی۔
مزید پڑھیں: پنجاب میں نئے تعمیراتی منصوبے بارش کا پانی ذخیرہ کرنے سے مشروط
ان سرگرمیوں کو فلائٹ آپریشنز کے لیے سنگین خطرہ قرار دیا گیا ہے، کیونکہ پرندے اور دیگر عوامل طیاروں کی لینڈنگ اور ٹیک آف کے دوران حادثات کا باعث بن سکتے ہیں۔
محکمہ داخلہ نے واضح کیا ہے کہ یہ پابندیاں 30 روز تک نافذ العمل رہیں گی، اس کے علاوہ صوبے بھر میں قائم تمام کمرشل ہوائی اڈوں کے اطراف بھی یہی قوانین لاگو ہوں گے۔
حکام نے ہدایت کی ہے کہ ائیرپورٹس اور ایئر بیسز کے گرد صفائی کے خصوصی انتظامات کیے جائیں اور قانون نافذ کرنے والے ادارے ان احکامات پر سختی سے عملدرآمد یقینی بنائیں۔
