پاکستانی پاپ گلوکار حسن رحیم نے کہا ہے کہ موسیقی اور فن کو سرحدوں کی قید سے آزاد ہونا چاہیے، اور فنکاروں کے درمیان تعاون آج کے دور میں پہلے کے مقابلے میں کہیں زیادہ آسان ہو گیا ہے۔
ایک انٹرویو میں حسن رحیم نے بتایا کہ 10 مئی کو ٹورنٹو میں ہونے والے کنسرٹ کے دوران بھارتی گلوکار تلویندر ان کے ساتھ اسٹیج پر آئے اور پہلی بار ان کے مشترکہ گانے ‘Wishes’ کو لائیو پرفارم کیا۔
View this post on Instagram
انہوں نے کہا کہ اس موقع پر وہ اپنے بھائی تلویندر سے بار بار گلے ملنے سے خود کو روک نہیں سکے۔ ان کے مطابق ’آخرکار موسیقی اور فن ہی جیتتے ہیں‘۔
رحیم نے بتایا کہ دونوں نے تین گانوں پر ساتھ کام کیا ہے اور انہیں تلویندر کی بے باکی اور منفرد انداز بہت پسند آیا۔ ان کے مطابق انہوں نے اس پرفارمنس کو سادہ رکھنے کی کوشش کی تھی تاہم جیسے ہی تلویندر اسٹیج پر آئے، حاضرین کا جوش و خروش غیر معمولی ہو گیا۔
یہ بھی پڑھیں: ’آپ مہدی حسن جیسی آواز کہاں سے لائیں گے‘
انہوں نے بتایا کہ انہوں نے ایک بار گانا پرفارم کیا، پھر سامعین کے اصرار پر دوسری بار بھی گایا۔ جب تیسری بار کی فرمائش ہوئی تو رحیم نے کہا کہ وہ اپنے مہمان کو مزید تھکانا نہیں چاہتے تھے لیکن تلویندر نے خود ہی اصرار کیا کہ وہ دوبارہ پرفارم کریں۔
جب ہارون رشید نے پوچھا کہ کیا انہیں اندازہ تھا کہ ان کے اس کولیبریشن کا کتنا اثر ہوگا تو انہوں نے کہا کہ جی ہاں، انہیں مکمل اندازہ تھا۔ انہوں نے کہا ’مجھے لگتا ہے کہ فن کو سرحدوں سے آزاد ہونا چاہیے‘۔
یہ بھی پڑھیں: پاکستانیوں نے 2025 میں ٹک ٹاک پر سب سے زیادہ کیا سرچ کیا؟ تفصیلات جاری
اپنے خیالات کا اظہار کرتے ہوئے حسن رحیم نے کہا کہ اگر کسی فنکار کا انداز، توانائی اور موسیقی پسند ہو تو رابطہ کرنا اور تعاون کی پیشکش کرنا ایک سادہ عمل ہے، تاہم لوگ اسے غیر ضروری طور پر پیچیدہ بنا دیتے ہیں۔
انہوں نے مزید کہا کہ وہ اپنے کنسرٹس میں دوستوں کے ساتھ اسٹیج شیئر کرنے کو خوش آئند سمجھتے ہیں کیونکہ وہ بچپن میں ایسے لمحات دیکھ کر بہت متاثر ہوتے تھے جب اسٹیج پر اچانک مہمان فنکار آتے تھے۔
یہ بھی پڑھیں: بھارتی گلوکارہ کی پاکستانی ہٹ گانے ’میری زندگی ہے تو‘ پر پرفارمنس پر وائرل
حسن رحیم کے مطابق ان کے والدین نے انہیں سکھایا ہے کہ زندگی کے تمام لمحات عارضی ہوتے ہیں اس لیے انہیں دوستوں اور قریبی لوگوں کے ساتھ بانٹنا چاہیے۔
واضح رہے کہ تلوندر نے ٹورنٹو میں منعقدہ کنسرٹ میں حسن رحیم کے ساتھ اسٹیج پر پرفارم کیا۔ دونوں فنکاروں کو ایک ساتھ گاتے، ایک دوسرے کو گلے لگاتے اور غیر رسمی انداز میں پرفارمنس کرتے دیکھا گیا، جس کے ویڈیوز اور تصاویر سوشل میڈیا پر وائرل ہو گئیں۔
بعد ازاں تلوندر نے انسٹاگرام پر کنسرٹ کی جھلکیاں شیئر کرتے ہوئے لکھا کہ ٹورنٹو میں خواب پورا ہوا۔ ان پوسٹس کے بعد بھارتیوں نے انہیں شدید تنقید کا نشانہ بنایا۔
