وزیراعظم پاکستان محمد شہباز شریف نے عید الاضحیٰ کے موقع پر ملائیشیا کے وزیراعظم ڈاکٹر انور ابراہیم سے ٹیلیفون پر رابطہ کیا، جس میں دونوں رہنماؤں نے ایک دوسرے کو عید کی مبارکباد دی اور خطے کی صورتحال خصوصاً امن کوششوں پر تفصیلی گفتگو کی۔
یہ بھی پڑھیں:پاکستان کی سفارتی پیشکش خوش آئند، امریکا اور ایران مذاکرات کی طرف آئیں، ملائیشین وزیراعظم انور ابراہیم
سرکاری اعلامیے کے مطابق دونوں رہنماؤں کے درمیان گفتگو انتہائی خوشگوار اور دوستانہ ماحول میں ہوئی۔ وزیراعظم شہباز شریف نے ملائیشین وزیراعظم اور عوام کو عید الاضحیٰ کی دلی مبارکباد پیش کی، جس کا ڈاکٹر انور ابراہیم نے بھی گرمجوشی سے جواب دیا اور پاکستان کے عوام کے لیے نیک خواہشات کا اظہار کیا۔
Prime Minister Muhammad Shehbaz Sharif held a telephone conversation with H.E. Dr. Anwar Ibrahim, Prime Minister of Malaysia, on the auspicious occasion of Eid ul-Adha.
During their most warm and cordial conversation, the Prime Minister conveyed heartfelt Eid ul Adha greetings… pic.twitter.com/ZKrC6cinLl
— Government of Pakistan (@GovtofPakistan) May 27, 2026
ملائیشین وزیراعظم نے اس موقع پر سابق وزیراعظم نواز شریف کے لیے بھی خصوصی نیک تمناؤں کا اظہار کیا۔
گفتگو کے دوران وزیراعظم انور ابراہیم نے خلیجی خطے میں جنگ بندی اور امن کے لیے پاکستان کے کردار کو سراہا اور کہا کہ پاکستان نے خطے میں امن کے قیام کے لیے قابلِ ذکر کوششیں کی ہیں۔ انہوں نے دعا کی کہ اللہ تعالیٰ وزیراعظم شہباز شریف اور ان کی ٹیم کو مزید کامیابیاں عطا کرے۔
وزیراعظم شہباز شریف نے اپنے ملائیشین ہم منصب کا پاکستان کے امن اقدامات کی حمایت پر شکریہ ادا کیا اور خطے میں جاری امن کوششوں پر انہیں تازہ ترین پیش رفت سے آگاہ کیا۔
دونوں رہنماؤں نے اس عزم کا اعادہ کیا کہ پاکستان اور ملائیشیا کے درمیان دوطرفہ تعلقات کو مزید مضبوط بنانے اور مختلف شعبوں میں تعاون بڑھانے کے لیے قریبی رابطے جاری رکھے جائیں گے۔
