پاکستان میں صوفی اوپیرا کی بنیاد رکھنے والی کراچی کی بیٹی اور بین الاقوامی شہرت یافتہ برطانوی پاکستانی سوپرانو سائرہ پیٹر عالمی موسیقی کی دنیا میں ایک نیا سنگِ میل عبور کرنے جارہی ہیں، وہ ہفتہ 6 جون 2026 کی شام لندن کے تاریخی’رائل البرٹ ہال‘ میں اپنے فنی کیریئر کا یادگار ڈیبیو کریں گی۔
اس تاریخی تقریب میں سائرہ پیٹر دنیا کے سب سے بڑے میوزیکل گروپس میں سے ایک، برطانیہ کے معروف ’آل سولز اورکیسٹرا اور 400 سے زائد گلوکاروں پر مشتمل ایک بہت بڑے کوائرکے ساتھ پرفارم کریں گی، جہاں اسٹیج پر ان کے ساتھ مجموعی طور پر 500 سے زائد برطانوی موسیقار موجود ہوں گے۔
سائرہ پیٹر اس تاریخی اسٹیج پر پرفارم کرنے والی ملکہ ترنم نور جہاں، اقبال بانو، عابدہ پروین اور راحت فتح علی خان جیسے پاکستان کے لیجنڈری فنکاروں کی فہرست میں شامل ہو جائیں گی۔
اس کنسرٹ کی خاص بات یہ ہے کہ وہ مغربی آرکیسٹرا کی دھنوں کے ساتھ روایتی پاکستانی ’تان‘ اور کلاسیکی صوفیانہ انداز کو اوپیرا کے ساتھ یکجا کر کے پیش کریں گی، جو مشرق اور مغرب کے مابین موسیقی کا ایک مضبوط ثقافتی پل ثابت ہوگا۔
فزیکل کیمسٹری اور اسلامی تاریخ میں ماسٹرز کی ڈگریاں رکھنے والی سائرہ پیٹر نے اس پرفارمنس کو اپنے لیے ایک بڑا چیلنج اور اعزاز قرار دیا ہے۔ بی بی سی (BBC) کی جانب سے لائیو اسٹریم کیے جانے والے اس بین الاقوامی ایونٹ میں دنیا بھر سے موسیقی کے دلدادہ افراد شرکت کریں گے جہاں وہ اپنی مادری زبان اردو سمیت متعدد زبانوں میں اپنے فن کا جادو جگائیں گی۔
