کالعدم جموں و کشمیر جوائنٹ عوامی ایکشن کمیٹی کے احتجاج کے دوران سی ایم ایچ راولاکوٹ سے منسوب ویڈیوز سوشل میڈیا پر تیزی سے وائرل ہو رہی ہیں۔
ویڈیوز کے بارے میں دعویٰ کیا جا رہا ہے کہ ایکشن کمیٹی سے تعلق رکھنے والے شرپسند عناصر نے اسپتال پر دھاوا بولتے ہوئے مریضوں کو تشدد کا نشانہ بنایا اور اسی دوران زیر علاج ایک زخمی پولیس اہلکار کو بھی مبینہ طور پر بہیمانہ تشدد کے بعد قتل کردیا۔
🚨 کالعدم ایکشن کمیٹی کے بلوائیوں کی جانب سے سی ایم ایچ راولاکوٹ میں مریضوں کو تشدد کا نشانہ بنانے کی ایک اور سی سی ٹی وی فوٹیج سامنے آگئئ۔
CCTV 2 pic.twitter.com/lx95ZbTzmr
— Salman Hasan (@salmanhasan136) June 11, 2026
ویڈیوز کے منظرعام پر آنے کے بعد سوشل میڈیا پر ان کی حقیقت کے حوالے سے شدید بحث چھڑ گئی۔
ایک طرف ایکشن کمیٹی کے حامیوں کا مؤقف ہے کہ یہ ویڈیوز راولاکوٹ کی نہیں، اس حوالے سے پروپیگنڈا کیا جارہا ہے۔ جبکہ دوسری جانب ناقدین کا کہنا ہے کہ ویڈیوز اصلی ہے اور ان میں دکھائے گئے واقعات حقیقت پر مبنی ہیں۔
وی نیوز نے اس معاملے پر تحقیق کی اور حقائق جاننے کی کوشش کی تو معلوم ہوا کہ سی ایم راولاکوٹ پر دھاوا اور زخمی پولیس اہلکار سمیت دیگر مریضوں پر تشدد کی ویڈیوز اصلی ہیں۔
اسپتال میں اہم انتظامی ذمہ داری انجام دینے والے ایک فرد نے نام ظاہر نہ کرنے کی شرط پر وی نیوز کو بتایا کہ کالعدم ایکشن کمیٹی سے وابستہ افراد اچانک اسپتال میں داخل ہوئے اور وہاں موجود مریضوں پر حملہ آور ہوگئے۔ ان کے بقول اس دوران کسی کو بھی نہیں بخشا گیا۔
سی ایم ایچ راولاکوٹ ہسپتال کی ویڈیو
جہاں کالعدم بلیک میل ایکشن کمیٹی کے عنڈوں نے ہسپتال پر حملہ کیا مریضوں کو تشدد کا نشانہ بنایا یاد رہے یہاں 80 فیصد مریض راولا کوٹ سے ھی تھے pic.twitter.com/IQtxK6kfNN— RH Riaz (@RH_views) June 11, 2026
واضح رہے کہ کالعدم جوائنٹ عوامی ایکشن کمیٹی کے مظاہرین راولاکوٹ میں دھرنا دیے ہوئے ہیں، جس کے باعث معمولاتِ زندگی متاثر ہیں اور شہریوں کو شدید مشکلات کا سامنا کرنا پڑرہا ہے۔
کالعدم ایکشن کمیٹی کی جانب سے اب تک کی گئی فائرنگ میں قانون نافذ کرنے والے اداروں کے 4 اہلکار شہید ہو چکے ہیں، جبکہ متعدد زخمی ہیں۔
نتیجہ: وی نیوز کی تحقیق کے مطابق سی ایم ایچ راولاکوٹ پر حملے سے متعلق وائرل ہونے والی دونوں ویڈیوز اصلی ہیں، اور حملہ کالعدم ایکشن کمیٹی کے شرپسند عناصر کی جانب سے کیا گیا۔
