وفاقی حکومت نے مالی سال 27-2026 کے بجٹ میں زرعی شعبے کی معاونت اور چھوٹے کاشتکاروں کو سہولت فراہم کرنے کے لیے زرخیز اسکیم کے تحت 300 ارب روپے کے بلاسود قرضوں کی فراہمی کا اعلان کردیا۔
بجٹ دستاویزات کے مطابق زرخیز اسکیم کے تحت ملک بھر کے قریباً ساڑھے سات لاکھ چھوٹے کاشتکاروں کو 300 ارب روپے کے بلاسود قرضے فراہم کیے جائیں گے تاکہ زرعی سرگرمیوں کو فروغ دیا جا سکے اور کسانوں کے مالی مسائل میں کمی لائی جا سکے۔
زرعی مشینری اور فی ایکڑ سبسڈی
حکومت نے زرعی مشینری پر سبسڈی کے لیے 5 ارب روپے مختص کیے ہیں، جبکہ 12 ایکڑ سے کم زرعی اراضی رکھنے والے کسانوں کو 1500 روپے فی ایکڑ سبسڈی دینے کا بھی اعلان کیا گیا ہے۔
بجٹ دستاویزات کے مطابق کھاد کی قیمتوں کو قابو میں رکھنے اور کسانوں کو ریلیف فراہم کرنے کے لیے کھاد تیار کرنے والی فیکٹریوں کو 20 ارب روپے کا خصوصی پیکیج دیا جائے گا۔
زرعی شعبے کو موسمیاتی تبدیلی کے اثرات اور ممکنہ نقصانات سے محفوظ رکھنے کے لیے عالمی بینک کے تعاون سے 20 کروڑ ڈالر مختص کیے گئے ہیں تاکہ اس شعبے کی استعداد کار کو بہتر بنایا جا سکے۔
بلوچستان کے ٹیوب ویلز اور یوتھ پروگرام کے لیے فنڈز
بجٹ دستاویزات میں بلوچستان کے زرعی ٹیوب ویلز کے لیے 3 ارب روپے کی سبسڈی مختص کی گئی ہے، جبکہ وزیراعظم یوتھ بزنس اور زرعی پروگرام کے تحت 20 ارب روپے رکھنے کی تجویز بھی دی گئی ہے۔
کاشتکاروں نے بجٹ کو مسترد کردیا
دوسری جانب کاشتکاروں کا مؤقف ہے کہ نئے بجٹ میں زرعی شعبے کو کوئی خاطر خواہ ریلیف نہیں دیا گیا، جس سے دیہی معیشت شدید بحران کا شکار ہونے کا خدشہ ہے۔
ملک بھر کے کاشتکاروں نے بجٹ پر مایوسی کا اظہار کرتے ہوئے کہا ہے کہ ڈی اے پی اور یوریا کھاد کی قیمتوں میں کمی نہ کرنا کسان دشمنی کے مترادف ہے۔
حکومت سے فوری ریلیف کا مطالبہ
لاہور میں کسان رہنماؤں اور کاشتکاروں نے حکومت سے پرزور مطالبہ کیا ہے کہ ملکی بقا اور زرعی خودکفالت کے لیے ڈی اے پی اور یوریا کھاد کی قیمتوں میں فوری کمی کی جائے۔
انہوں نے کہا کہ اگر زرعی شعبے کے لیے خصوصی سبسڈی کا اعلان نہ کیا گیا تو زرعی پیداوار میں شدید کمی ہو سکتی ہے، اس لیے حکومت کسانوں کے مسائل کے حل کے لیے فوری اقدامات کرے۔
