آزاد کشمیر میں جاری احتجاجی صورتحال کے باعث پیدا ہونے والا بحران مزید سنگین رخ اختیار کر گیا ہے۔ راولپنڈی گڈز کیریئر ایسوسی ایشن نے سیکیورٹی خدشات کے پیش نظر آزاد کشمیر کے لیے مال بردار ٹرانسپورٹ سروس فوری طور پر معطل کرنے کا اعلان کر دیا ہے، جس کے بعد اشیائے ضروریہ کی فراہمی متاثر ہونے اور قلت پیدا ہونے کے خدشات بڑھ گئے ہیں۔
گڈز کیریئر ایسوسی ایشن کے مطابق بعض مقامات پر مال بردار گاڑیوں کو نشانہ بنانے، سامان کی لوٹ مار اور ڈرائیوروں کو ہراساں کیے جانے کے واقعات کے بعد یہ فیصلہ کیا گیا۔ ٹرانسپورٹرز کا کہنا ہے کہ موجودہ حالات میں ڈرائیوروں اور سامان کی حفاظت یقینی بنائے بغیر سروس جاری رکھنا ممکن نہیں۔
دوسری جانب آزاد کشمیر میں جاری احتجاج اور راستوں کی بندش کے باعث معمولاتِ زندگی پہلے ہی شدید متاثر ہیں۔ عوامی حلقوں کا کہنا ہے کہ ریاست میں آٹا، چینی، گھی، دالوں، ادویات اور دیگر ضروری اشیا کی بڑی مقدار راولپنڈی کے راستے پہنچتی ہے، لہٰذا ٹرانسپورٹ سروس کی طویل معطلی سپلائی چین کو متاثر کر سکتی ہے۔
مزید پڑھیں:کالعدم ایکشن کمیٹی کے مسلح جتھوں کی پولیس گاڑی پر فائرنگ، نام نہاد پرامن احتجاج کی حقیقت عیاں
شہریوں نے حکومت سے مطالبہ کیا ہے کہ امن و امان کی صورتحال بہتر بنانے، ٹرانسپورٹرز کو تحفظ فراہم کرنے اور اشیائے ضروریہ کی بلا تعطل فراہمی یقینی بنانے کے لیے فوری اقدامات کیے جائیں تاکہ ممکنہ بحران سے بچا جا سکے۔
