قومی اسمبلی کے اسپیکر سردار ایاز صادق نے اعلان کیا ہے کہ آئندہ مالی سال کے بجٹ پر ایوان میں ہونے والی بحث مکمل ہو چکی ہے، جو مجموعی طور پر 7 روز تک جاری رہی۔ اس دوران 232 ارکان نے بجٹ پر اپنے خیالات کا اظہار کیا۔
قومی اسمبلی کا اجلاس اسپیکر سردار ایاز صادق کی صدارت میں منعقد ہوا، جہاں انہوں نے بجٹ اجلاس کی کارروائی کی تفصیلات ایوان کے سامنے پیش کیں۔
اسپیکر نے بتایا کہ بجٹ بحث میں حکومتی اتحاد کے 151 جبکہ اپوزیشن کے 81 ارکان نے حصہ لیا۔ مجموعی طور پر بجٹ پر 53 گھنٹے 31 منٹ تک بحث ہوئی، جس میں حکومتی ارکان نے 34 گھنٹے 33 منٹ جبکہ اپوزیشن نے 18 گھنٹے 58 منٹ اظہار خیال کیا۔
کس جماعت کے کتنے ارکان نے اظہار خیال کیا؟
ایاز صادق کے مطابق بجٹ بحث میں مسلم لیگ (ن) کے 77، پاکستان پیپلز پارٹی کے 49، ایم کیو ایم پاکستان کے 20، پاکستان تحریک انصاف کے 67، سنی اتحاد کونسل کے ایک اور جمعیت علمائے اسلام (ف) کے 10 ارکان نے حصہ لیا۔
اسپیکر قومی اسمبلی نے بتایا کہ اپوزیشن کو بجٹ بحث کے لیے طے شدہ دورانیے سے 8 گھنٹے 18 منٹ زیادہ وقت فراہم کیا گیا، تاکہ تمام ارکان کو اپنی رائے پیش کرنے کا مناسب موقع مل سکے۔
