اٹلی کے دارالحکومت روم کے قریب ایک اہم آثارِ قدیمہ دریافت ہوا ہے جہاں ماہرین کو قدیم رومی دور کا ایک عظیم ’ولا‘ ملا ہے جس میں خوبصورت موزیک فرش اور تاریخی ڈھانچے موجود ہیں۔
یہ دریافت روم کے نواحی علاقے ’کاسٹیل دی گیوڈو‘ میں ہوئی، جو قدیم رومی دور میں ’لوریم‘کے نام سے ایک اہم رہائشی علاقہ سمجھا جاتا تھا۔ یہ خطہ رومی سلطنت (27 قبل مسیح سے پانچویں صدی عیسوی) کے دوران اشرافیہ اور شاہی شخصیات کی رہائش کے لیے معروف تھا۔
اطالوی وزارت ثقافت کے مطابق یہ انکشاف اس وقت سامنے آیا جب مقامی افراد نے علاقے میں مشکوک کھدائی کی اطلاع دی، جس پر پولیس نے فوری کارروائی کرتے ہوئے غیر قانونی کھدائی روک دی۔
مزید پڑھیں: آزاد کشمیر ہائیکورٹ: آثار قدیمہ کے اردگرد 200 فٹ کی حدود میں ہر قسم کی مداخلت پر پابندی عائد
بعد ازاں ماہرین آثار قدیمہ نے تصدیق کی کہ یہ مقام ایک بڑا اور محفوظ رومی ’ولا‘ ہے جہاں شاندار داخلی ہال، مرکزی صحن اور پانی جمع کرنے کا قدیم نظام موجود ہے جسے ’امپلووئیم‘ کہا جاتا ہے۔
فرش پر سیاہ اور سفید رنگ کے موزیک موجود ہیں جن پر نباتاتی اور ہندسی نقش و نگار بنے ہوئے ہیں، جو قدیم رومی فن تعمیر کی اعلیٰ مثال سمجھے جاتے ہیں۔
حکام کے مطابق نامعلوم افراد نے بھاری مشینری کے ذریعے غیر قانونی کھدائی کی کوشش کی تھی تاہم ’کارابینیری‘ نے بروقت کارروائی کرتے ہوئے یہ عمل روک دیا۔
ماہرین کا کہنا ہے کہ یہ ’ولا‘ ممکنہ طور پر رومی اشرافیہ یا شاہی خاندان سے تعلق رکھنے والے افراد کی ملکیت ہو سکتا ہے، کیونکہ اس کی تزئین و آرائش انتہائی شاندار اور نفیس ہے۔
مزید پڑھیں: امریکا: ماہرین آثار قدیمہ نے کس طرح ’مستقبل میں قدیم زیور‘ کا درجہ پانے والی انگوٹھی کھوج نکالی
اطالوی وزارت ثقافت نے کہا ہے کہ کھدائی کا عمل جاری ہے اور مزید اہم تاریخی آثار سامنے آنے کا امکان ہے، جبکہ مستقبل میں عوام کو محدود اجازت کے ساتھ اس مقام کا دورہ کرایا جائے گا۔
