اب صرف بلا اور گیند ہی نہیں چلیں گے، پاکستانی کرکٹرز کی کارکردگی کے لیے ہائی ٹیک فارمولا بھی تیار

پاکستان کرکٹ بورڈ (پی سی بی) کے ہائی پرفارمنس ڈائریکٹر عاقب جاوید نے طویل تربیتی کیمپوں کے دوران قومی کرکٹرز کے لیے ’پیڈل ٹینس‘ کھیلنا لازمی قرار دے دیا ہے، جس کے لیے نیشنل کرکٹ اکیڈمی (این سی اے) میں ہی جدید ترین کورٹس قائم کر دیے گئے ہیں۔

فٹنس اور فیلڈنگ میں نکھار لانے کی نئی کوشش

نجی ٹی وی سے گفتگو کرتے ہوئے عاقب جاوید نے بتایا کہ طویل تربیتی کیمپوں کے دوران کھلاڑیوں کو بوریت سے بچانے اور ان کی فٹنس کو جدید تقاضوں کے مطابق ڈھالنے کے لیے یہ قدم اٹھایا گیا ہے۔

یہ بھی پڑھیں:پی آئی اے اور پاکستان کرکٹ بورڈ کا ایم او یو: عارف حبیب اور محسن نقوی کی دلچسپ گفتگو

انہوں نے واضح کیا کہ اب طویل کیمپوں میں ہر دوسرے دن کھلاڑیوں کے لیے کم از کم 40 منٹ پیڈل ٹینس کھیلنا لازمی ہوگا۔ عاقب جاوید کا کہنا تھا کہ ’پیڈل ٹینس کے دوران جسمانی حرکات براہِ راست فیلڈنگ کی ضرورتوں سے ملتی جلتی ہیں، جس سے کھلاڑیوں کی فٹنس اور گراؤنڈ فیلڈنگ دونوں میں زبردست بہتری آئے گی‘۔

کھلاڑیوں کو اب اکیڈمی سے باہر جانے کی ضرورت نہیں

سابق ٹیسٹ فاسٹ باؤلر نے مزید بتایا کہ اس سے قبل کھلاڑیوں کو پیڈل ٹینس کھیلنے کے لیے اکیڈمی سے باہر جانا پڑتا تھا، لیکن اب این سی اے کے اندر ہی یہ عالمی معیار کی سہولت فراہم کر دی گئی ہے تاکہ کھلاڑیوں کا وقت اور توانائی دونوں بچ سکیں۔

پی سی بی کا بنیادی مقصد کھلاڑیوں کو اکیڈمی کے اندر ہی ایسا پیشہ ورانہ ماحول فراہم کرنا ہے جہاں وہ ذہنی اور جسمانی طور پر خود کو تازہ دم رکھ سکیں۔

باسکٹ بال کورٹ اور انڈور گیمز کے دور رس منصوبے

عاقب جاوید نے انکشاف کیا کہ پی سی بی اپنے طویل مدتی پروگرام کے تحت نیشنل کرکٹ اکیڈمی میں کھیلوں اور تفریح کی دیگر سہولیات کو مزید وسعت دے رہا ہے۔

مزید پڑھیں:چیمپیئنز ٹرافی 2025 کے شاندار اختتام پر چیئرمین پاکستان کرکٹ بورڈ نے کیا پیغام دیا؟

مستقبل قریب میں کرکٹرز کے لیے باسکٹ بال کورٹ اور ایک جدید گیم روم بھی قائم کیا جائے گا، جہاں سنوکر اور دیگر انڈور گیمز دستیاب ہوں گی۔

ان کا کہنا تھا کہ دنیا بھر کے پیشہ ور کھلاڑی صرف اپنے بنیادی کھیل پر انحصار نہیں کرتے بلکہ دیگر کھیلوں میں حصہ لے کر اپنی ذہنی تازگی اور عضلاتی لچک کو برقرار رکھتے ہیں۔