نیشنل ڈیٹا بیس اینڈ رجسٹریشن اتھارٹی (نادرا) نے اپنی پاک آئی ڈی (Pak ID) موبائل ایپ کا نیا ورژن 5.6.6 جاری کر دیا ہے، جس میں صارفین کے لیے 2 اہم نئی سہولتیں متعارف کرائی گئی ہیں۔ اب درخواست گزار شناختی کارڈ کی درخواست جمع کرانے سے پہلے اس کا مکمل پیشگی جائزہ لے سکیں گے، جبکہ خیبرپختونخوا میں پیدائش، وفات، شادی اور طلاق کی ڈیجیٹل رجسٹریشن کا آغاز بھی کر دیا گیا ہے۔
نیشنل ڈیٹا بیس اینڈ رجسٹریشن اتھارٹی (نادرا) نے پاک آئی ڈی (Pak ID) موبائل ایپ کا ورژن 5.6.6 جاری کرتے ہوئے صارفین کے لیے دو نئی سہولتیں متعارف کرا دی ہیں۔
نادرانے پاک آئی ڈی موبائل ایپ کا نیاورژن 6.5.6جاری کردیا ہے۔"کارڈ دیکھیں"کے نئے فیچرکی بدولت اب آپ درخواست جمع کرانے سے پہلے اپنامتوقع شناختی کارڈدیکھ سکتے ہیں، اس پردرج معلومات کاجائزہ لے سکتے ہیں اورغلطی کی صورت میں متعلقہ فیلڈمیں جاکر تصحیح کرسکتے ہیںhttps://t.co/g5iQ4MBZn5
— NADRA (@NadraPak) July 16, 2026
نادرا کے مطابق نئی اپ ڈیٹ میں ’ویو کارڈ‘ (View Card) فیچر شامل کیا گیا ہے، جس کے ذریعے درخواست گزار کمپیوٹرائزڈ قومی شناختی کارڈ کی درخواست جمع کرانے سے قبل اپنے کارڈ کا مکمل پیشگی جائزہ لے سکیں گے۔
اس فیچر کے ذریعے صارفین شناختی کارڈ پر درج تمام ذاتی معلومات کی تصدیق کر سکیں گے، اور اگر کسی قسم کی غلطی نظر آئے تو درخواست جمع کرانے سے پہلے متعلقہ حصے میں واپس جا کر اسے درست بھی کر سکیں گے۔
دوسری اہم پیشرفت کے طور پر نادرا نے خیبرپختونخوا میں پیدائش، وفات، شادی اور طلاق کی ڈیجیٹل رجسٹریشن کی سہولت بھی پاک آئی ڈی ایپ کے ذریعے فراہم کر دی ہے۔
یہ بھی پڑھیں:’شناختی کارڈ پر میری مرضی کی تصویر لگاؤ ورنہ دفتر بند کرو‘، نادرا کے باہر خاتون کا انوکھا مطالبہ
پہلے مرحلے میں یہ سروس پشاور کے تمام ویلج اور نیبرہڈ کونسلز میں دستیاب ہوگی، جبکہ نادرا کا کہنا ہے کہ آئندہ مرحلہ وار اسے پورے صوبے تک توسیع دی جائے گی۔
اس اقدام سے شہری رجسٹریشن دفاتر جانے کے بجائے گھر بیٹھے اہم شہری واقعات کی آن لائن رجسٹریشن کرا سکیں گے، جس سے وقت اور اخراجات دونوں کی بچت ہوگی۔
نادرا نے صارفین سے اپیل بھی کی ہے کہ وہ پاک آئی ڈی ایپ کے استعمال سے متعلق اپنی آراء اور مستقبل میں شامل کیے جانے والے نئے فیچرز کے لیے تجاویز بھی فراہم کریں، تاکہ ایپ کو مزید مؤثر اور صارف دوست بنایا جا سکے۔
