معروف پاکستانی اداکار شہریار منور نے اپنے مداحوں کے دلوں کی دھڑکنیں تیز کرتے ہوئے اپنے آنے والے نئے ڈراما سیریل ’دارالنجات‘ کا پہلا سنسنی خیز اور جذباتی ٹیزر جاری کر دیا ہے۔
انسٹاگرام پر شیئر کیے گئے اس مختصر کلپ نے ریلیز ہوتے ہی سوشل میڈیا پر مداحوں کو تجسس میں مبتلا کر دیا ہے، جس میں محبت، ٹوٹتے دلوں اور صدموں کی ایک گہری داستان کی جھلک دکھائی گئی ہے۔
عمیرہ احمد کی جاندار کہانی
نجی ٹی وی کے بینر تلے بننے والے اس بڑے پروجیکٹ کی کہانی نامور مصنفہ عمیرہ احمد نے تحریر کی ہے۔
View this post on Instagram
ٹیزر کی بات کریں تو اس میں درِفشاں سلیم اور ابھرتے ہوئے اداکار نمیر خان کو امریکا میں ایک ساتھ خوشگوار موڈ میں دکھایا گیا ہے، جو ممکنہ طور پر ایک دوسرے کی محبت میں گرفتار ہیں۔
دوسری طرف، شہریار منور کا کردار ایک متوسط اپر کلاس پاکستانی نوجوان کا ہے جو مذہبی اقدار سے گہرا لگاؤ رکھتا ہے۔
کہانی میں مذہب اور جدید لائف اسٹائل کا ایک بڑا تضاد دکھایا گیا ہے، جہاں نمیر خان کا کردار شہریار کے بالکل برعکس ایک جدید طرزِ زندگی کا عکاس ہے، جبکہ درِفشاں سلیم مختلف مناظر میں دونوں دنیاؤں کے درمیان جھولتی نظر آتی ہیں۔
ٹیزر میں قرآنی آیات اور اسلامی تعلیمات کے حوالے بھی شامل ہیں، جو اس بات کا واضح اشارہ ہیں کہ ڈرامے کے تانے بانے مذہب اور اخلاقیات کے گرد بنے گئے ہیں۔
تھپڑ، ٹوٹتا شیشہ اور شدید سسپنس، ‘ڈیسٹینی، ہارٹ بریک اور ریڈیمپشن
ٹیزر کے مختلف مناظر کہانی میں موجود شدید تناؤ کی عکاسی کرتے ہیں، ایک منظر میں درِفشاں سلیم کو نمیر خان کے چہرے پر زوردار تھپڑ مارتے ہوئے دکھایا گیا ہے، جبکہ ایک اور منظر میں شدید غصے میں فرش پر شیشہ توڑا جا رہا ہے۔
یہ بھی پڑھیں:بلال عباس سے خفیہ نکاح؟ درفشاں سلیم نے بڑا انکشاف کر دیا
چینل کی جانب سے اس ڈرامے کو ‘تقدیر، دل ٹوٹنے اور نجات کی ایک طاقتور کہانی’ قرار دیا گیا ہے، تاہم کہانی کے اصل رخ کو ابھی تک سسپنس میں رکھا گیا ہے۔
View this post on Instagram
اگرچہ ڈرامے کی ریلیز کی حتمی تاریخ کا اعلان نہیں کیا گیا اور ٹیزر پر صرف ‘کمنگ سون’ لکھا ہے، مگر اس کی شاندار اسٹار کاسٹ نے پہلے ہی مداحوں کو انتظار پر مجبور کر دیا ہے۔
شہریار منور کی پچھلی سوشل میڈیا پوسٹس کے مطابق اس ڈرامے میں سحر ہاشمی، رومیسہ خان، ثانیہ سعید اور صبا حمید جیسے نامور ستارے بھی اپنی اداکاری کے جوہر دکھائیں گے۔
واضح رہے کہ ‘دارالنجات’ کی ہدایات ثاقب خان نے دی ہیں اور یہ شہریار منور اور سونیا خان کی پروڈکشن کمپنی ‘تھریز انٹرٹینمنٹ’ کا پہلا باضابطہ ڈرامہ سیریل ہے۔
