پاکستان کرکٹ ٹیم کے سابق کپتان شاہد آفریدی نے حال ہی میں کراچی کی موجودہ صورتحال پر گہری تشویش کا اظہار کیا ہے۔
ایک پوڈکاسٹ میں گفتگو کرتے ہوئے شاہد آفریدی نے کہا کہ وہ حال ہی میں کراچی کے علاقے کورنگی گئے تھے جہاں کی صورتحال دیکھ کر انہیں شدید مایوسی ہوئی۔ ان کا کہنا تھا کہ کراچی ملکی معیشت میں اہم کردار ادا کرتا ہے، اربوں روپے کا کاروبار ہوتا ہے اور ہزاروں افراد کا روزگار اس سے وابستہ ہے مگر وہاں کی خستہ حال سڑکیں اور بنیادی سہولیات کی کمی باعثِ شرمندگی ہیں۔
View this post on Instagram
انہوں نے کہا کہ کافی عرصے بعد کراچی آیا تھا اور امید تھی کہ شہر میں نمایاں بہتری دیکھنے کو ملے گی تاہم کورنگی، یونیورسٹی روڈ اور دیگر علاقوں کی حالت دیکھ کر افسوس ہوا۔ ان کے مطابق بعض اہم شاہراہوں پر طویل عرصے سے تعمیراتی کام جاری ہے لیکن اس کی تکمیل نظر نہیں آ رہی۔
شاہد آفریدی کا کہنا تھا کہ کراچی پاکستان کا سب سے بڑا شہر ہے اور اسے بہتر بنانے کے لیے سنجیدہ منصوبہ بندی اور عملی اقدامات کی اشد ضرورت ہے۔ انہوں نے زور دیا کہ شہری مسائل کے حل اور انفراسٹرکچر کی بہتری کے لیے متعلقہ اداروں کو مؤثر انداز میں کام کرنا ہوگا۔
