ڈیرہ غازی خان کے ٹرائی بارڈر ایریا میں واقع ویلج لکھانی، پولیس اسٹیشن وہوا کے علاقے میں پاکستان رینجرز کی جانب سے خصوصی فری میڈیکل کیمپ کا انعقاد کیا گیا۔ کیمپ کا مقصد دور دراز علاقوں میں مقیم مقامی آبادی کو ان کی دہلیز پر معیاری طبی سہولیات فراہم کرنا اور عوامی روابط کو مزید مضبوط بنانا تھا۔
یہ بھی پڑھیں: ’پاکستان زندہ باد‘: واہگہ بارڈر پر پریڈ کی پروقار تقریب، شرکا کا دفاع وطن کے لیے ہر قربانی دینے کا عزم
کیمپ میں ماہر ڈاکٹروں پر مشتمل میڈیکل ٹیم نے خدمات انجام دیں، جن میں آئی اسپیشلسٹ، گائناکالوجسٹ، ای این ٹی اسپیشلسٹ اور دیگر میڈیکل افسران شامل تھے۔
ٹرائی بارڈر ایریا کے مختلف علاقوں سے بڑی تعداد میں مرد، خواتین، بزرگ اور بچوں نے کیمپ سے استفادہ کیا۔ تمام مریضوں کا مکمل طبی معائنہ کیا گیا جبکہ ضرورت کے مطابق انہیں مفت ادویات بھی فراہم کی گئیں۔
مقامی آبادی نے رینجرز کی اس فلاحی کاوش کو سراہتے ہوئے اسے علاقے کے عوام کے لیے ایک مثبت اور خوش آئند اقدام قرار دیا۔ ان کا کہنا تھا کہ ایسے طبی کیمپ دور افتادہ علاقوں کے مکینوں کو بنیادی صحت کی سہولیات کی فراہمی میں اہم کردار ادا کرتے ہیں۔
رینجرز کے مطابق فری میڈیکل کیمپ کا انعقاد عوام اور ریاستی اداروں کے درمیان اعتماد، تعاون اور مضبوط روابط کے فروغ کی جانب ایک اہم قدم ہے۔
مزید پڑھیں: پاکستان رینجرز کی کارروائی، سرحد عبور کرنے والے بی ایس ایف اہلکار کو گرفتار کرلیا
ترجمان رینجرز نے اس عزم کا اعادہ کیا کہ ٹرائی بارڈر ایریا میں عوامی خدمت اور فلاحی سرگرمیوں کا سلسلہ مستقبل میں بھی جاری رکھا جائے گا۔
