پاکستان نے شاندار کارکردگی کا مظاہرہ کرتے ہوئے سینٹرل ایشین والی بال چیمپیئن شپ کا ٹائٹل اپنے نام کر لیا۔
یہ بھی پڑھیں: پاکستان نے نیپال کو شکست دے کر سینٹرل ایشین والی بال چیمپیئن شپ کے سیمی فائنل میں جگہ بنا لی
قومی ٹیم نے فائنل میں بنگلہ دیش کو مسلسل 3 سیٹس میں شکست دے کر چیمپیئن بننے کا اعزاز حاصل کیا۔
اسلام آباد میں کھیلے گئے فائنل میں پاکستان نے ابتدا ہی سے کھیل پر اپنی گرفت مضبوط رکھی اور بنگلہ دیش کو 20-25، 16-25 اور 20-25 سے شکست دے کر ٹورنامنٹ اپنے نام کر لیا۔
سینٹرل ایشین والی بال چیمپیئن شپ میں مجموعی طور پر 6 ٹیموں نے حصہ لیا جبکہ پاکستانی ٹیم پورے ایونٹ میں ناقابل شکست رہی اور شاندار انداز میں ٹائٹل جیتا۔
ٹورنامنٹ میں تیسری پوزیشن کے لیے کھیلے گئے میچ میں سری لنکا نے ازبکستان کو زیر کر کے تیسری پوزیشن حاصل کی۔
مزید پڑھیے: پاکستان نے نیپال کو شکست دے کر سینٹرل ایشین والی بال چیمپیئن شپ کے سیمی فائنل میں جگہ بنا لی
دریں اثنا وزیراعظم شہباز شریف نے سینٹرل ایشین والی بال چیمپئن شپ میں کامیابی پر قومی ٹیم کو مبارکباد دیتے ہوئے کھلاڑیوں، کوچنگ اسٹاف اور ٹیم مینجمنٹ کی کارکردگی کو سراہا۔
وزیراعظم نے اپنے بیان میں کہا کہ قومی ٹیم نے عمدہ کھیل، بہترین حکمت عملی اور شاندار ٹیم ورک کا مظاہرہ کرتے ہوئے پوری قوم کا سر فخر سے بلند کیا۔
انہوں نے کہا کہ پاکستان کے باصلاحیت نوجوان کھیلوں کے ہر شعبے میں ملک کا نام عالمی سطح پر روشن کرنے کی بھرپور صلاحیت رکھتے ہیں۔
مزید پڑھین: ایشین انڈر 18 والی بال چیمپیئن شپ میں پاکستان کا فاتحانہ آغاز، کرغیزستان کو 0-3 سے شکست
شہباز شریف نے اس عزم کا اعادہ کیا کہ حکومت ملک میں کھیلوں کے فروغ اور نوجوان کھلاڑیوں کی ہر ممکن سرپرستی کا سلسلہ جاری رکھے گی۔
