بھارتی اداکارہ، گلوکارہ اور ٹی وی شخصیت شہناز گل نے پاکستانی ڈراموں کی تعریف کرتے ہوئے کہا ہے کہ محبت، جذبات اور کہانی سنانے کے انداز میں پاکستانی ڈراموں کا کوئی مقابلہ نہیں۔
ایک حالیہ انٹرویو میں شہناز گل نے اپنے پسندیدہ پاکستانی فنکاروں کا ذکر کرتے ہوئے ہانیہ عامر، بلال عباس اور فہد مصطفیٰ کے نام لیے۔ انہوں نے کہا کہ پاکستانی ڈراموں کی مضبوط کہانیاں، کرداروں کے درمیان فطری کیمسٹری اور جذبات کی خوبصورت عکاسی ناظرین کو ابتدا سے اختتام تک اپنے سحر میں جکڑے رکھتی ہے۔
View this post on Instagram
انہوں نے کہا کہ پاکستانی ڈراموں کی سب سے نمایاں خوبی یہ ہے کہ ان میں محبت کے اظہار کے لیے جسمانی قربت کا سہارا نہیں لیا جاتا بلکہ صرف نظریں، مکالمے، احساسات اور کرداروں کے جذبات ہی رشتوں کی گہرائی کو مؤثر انداز میں بیان کرنے کے لیے کافی ہوتے ہیں۔
شہناز گل کے مطابق یہی فطری انداز پاکستانی ڈراموں کو دنیا بھر کے دیگر ڈراموں سے منفرد بناتا ہے جبکہ ان کی اسٹوری ٹیلنگ ناظرین کی دلچسپی کو آخری قسط تک برقرار رکھتی ہے۔
یہ بھی پڑھیں: شہناز گل نے کیا واقعی سدھارتھ کی موت سے فائدہ اٹھایا؟
انہوں نے مزید کہا کہ پاکستانی ڈراموں کا معیار، جذباتی گہرائی اور رومانس پیش کرنے کا منفرد انداز واقعی قابلِ تعریف ہے اور یہی خصوصیات انہیں دوسرے ممالک کے ڈراموں سے ممتاز بناتی ہیں۔
واضح رہے کہ شہناز گل کو ریئلٹی شو بگ باس 13 میں شرکت کے بعد غیرمعمولی شہرت ملی۔ مرحوم اداکار سدھارتھ شکلا کے ساتھ ان کی دوستی بھی مداحوں میں بے حد مقبول رہی۔ بعد ازاں انہوں نے سلمان خان کی فلم ’کسی کا بھائی کسی کی جان‘ سے بالی ووڈ میں قدم رکھا جبکہ ’تھینک یو فار کمنگ‘ سمیت دیگر فلموں میں بھی اپنی اداکاری کے جوہر دکھائے۔
