انسپکٹر جنرل پولیس آزاد جموں و کشمیر، کیپٹن (ر) لیاقت علی ملک نے انتخابی عمل کے دوران مظفرآباد ڈویژن کے مختلف پولنگ اسٹیشنز کا دورہ کیا، جہاں انہوں نے سیکیورٹی انتظامات کا تفصیلی جائزہ لیا اور ڈیوٹی پر مامور پولیس افسران و جوانوں سے ملاقات کرکے ان کی کارکردگی کو سراہا۔
دورے کے دوران آئی جی پی نے مختلف پولنگ اسٹیشنز پر انتخابی انتظامات اور سیکیورٹی کی مجموعی صورتحال کا معائنہ کیا۔
اس موقع پر پولنگ اسٹیشنز پر ووٹرز کا پرجوش رش دیکھنے میں آیا، جہاں خواتین، بزرگ اور نوجوان اپنی فیملیز کے ہمراہ حق رائے دہی استعمال کرنے پہنچے۔
دورے کے موقع پر آئی جی پی کیپٹن (ر) لیاقت علی ملک نے بچوں سے بھی شفقت بھری ملاقات کی، ان سے خوشگوار انداز میں گفتگو کی اور ان پر محبت کا اظہار کیا، جس پر وہاں موجود شہریوں نے بھی خوشی کا اظہار کیا۔
اس موقع پر آئی جی پولیس نے اس عزم کا اعادہ کیاکہ آزاد جموں و کشمیر پولیس عوام کے پُرامن، محفوظ اور شفاف انتخابی عمل کو یقینی بنانے کے لیے ہر لمحہ اپنے فرائض انجام دے رہی ہے۔
