کامن ویلتھ گیمز گلاسگو میں پاکستان کے لیے واحد تمغہ جیتنے والی باکسر فاطمہ زہرہ وطن واپس پہنچ گئیں جہاں لاہور ایئرپورٹ پر ان کا شاندار استقبال کیا گیا۔
فاطمہ زہرہ نے 60 کلوگرام کیٹیگری میں کانسی کا تمغہ جیت کر نہ صرف پاکستان کے لیے واحد میڈل اپنے نام کیا بلکہ کامن ویلتھ گیمز کی تاریخ میں میڈل حاصل کرنے والی پہلی پاکستانی خاتون باکسر بھی بن گئیں۔
فاطمہ زہرہ نے میڈیا سے گفتگو کرتے ہوئے کہا کہ کامن ویلتھ گیمز میں شرکت ان کے لیے ایک شاندار تجربہ ثابت ہوئی، جس سے ان کے اعتماد میں مزید اضافہ ہوا ہے۔ انہوں نے کہا کہ اگلی بار وہ گولڈ میڈل جیتنے کے عزم کے ساتھ میدان میں اتریں گی۔
انہوں نے بتایا کہ انہیں اپنی تیاری پر مکمل اعتماد تھا اور بہترین ٹریننگ کی بدولت وہ پاکستان کے لیے میڈل جیتنے میں کامیاب رہیں۔ فاطمہ زہرہ کا کہنا تھا کہ اگر انہیں بین الاقوامی سطح پر ٹریننگ اور ایکسپوژر ٹورز کا موقع ملتا تو وہ کانسی نہیں بلکہ گولڈ میڈل جیت کر وطن لوٹتیں۔
واضح رہے کہ فاطمہ زہرہ کو 60 کلوگرام کیٹیگری کے سیمی فائنل میں کینیڈا کی باکسر کے ہاتھوں شکست کا سامنا کرنا پڑا تاہم سیمی فائنل تک رسائی کے باعث انہوں نے کانسی کا تمغہ اپنے نام کیا اور پاکستان کے لیے تاریخی اعزاز حاصل کیا۔
