پاکستان کی ایک چوتھائی آبادی نے آئندہ انتخابات کی شفافیت پر بہت زیادہ اعتماد کا اظہار کیا ہے۔ 26 فیصد پاکستانی سمجھتے ہیں کہ آئندہ عام انتخابات آزاد، شفاف اور بے عیب ہوں گے۔
گیلپ اینڈ گیلانی پاکستان کے سروے میں پاکستان بھر سے شماریاتی طور پر منتخب 1535 مرد و خواتین سے سوال کیا گیا تھا کہ ’آپ کس حد تک پر اعتماد ہیں کہ آئندہ عام انتخابات آزاد وشفاف ہوں گے؟‘ اس سوال کے جواب میں 26 فیصد رائے دہندگان نے کہا کہ وہ آئندہ عام انتخابات آزاد و شفاف ہونے کے بارے میں بہت زیادہ پر اعتماد ہیں جبکہ 23 فیصد کی رائے تھی کہ وہ اس حوالے سے کسی حد تک پُراعتماد ہیں۔
17 فیصد رائے دہندگان نے کہا کہ انہیں آئندہ عام انتخابات کے آزادانہ و شفاف انعقاد پر بہت کم اعتماد ہے جبکہ 26 فیصد نے کہا کہ انہیں اس حوالے سے بالکل بھی اعتماد نہیں ہے جبکہ 8 فیصد رائے دہندگان نے اس حوالے سے کوئی رائے نہیں دی۔
سروے منتظمین کے مطابق سروے پاکستان کے چاروں صوبوں کی شہری اور دیہی آبادی کے شماریاتی طور پر منتخب 1535 مرد و خواتین سے 29 مارچ 2023 سے 7 اپریل 2023 کے دوران کیا گیا تھا۔ سروے کا طریقہ کار فون پر کیے گئے سوالات تھے، نتائج اخذ کیے جانے میں غلطی کا احتمال بہت کم ہے۔
