امریکی صدر ڈونلڈ ٹرمپ نے ریاست نیواڈا میں ایک عوامی تقریب کے دوران اسٹیج پر موجود ایک کمسن بچے کو گرنے سے بچاتے ہوئے سابق صدر جو بائیڈن پر طنزیہ جملہ کہا، جس پر تقریب قہقہوں اور تالیوں سے گونج اٹھی۔ تقریب کے دوران بچے اور ٹرمپ کے درمیان ہونے والی دلچسپ گفتگو بھی شرکاء کی توجہ کا مرکز بنی۔
یہ واقعہ اس وقت پیش آیا جب ٹرمپ نے لاس ویگاس سے تعلق رکھنے والے میاں بیوی، سینڈرا اور بریڈ، کو ان کے دو کمسن بچوں سمیت ’ریڈ راک کیسینو ریزورٹ اینڈ اسپا‘ کے اسٹیج پر مدعو کیا۔ اس موقع پر وہ اپنی انتظامیہ کے ’ٹرمپ اکاؤنٹس پروگرام‘ اور ’ٹپس پر ٹیکس نہیں‘ پالیسی کی تشہیر کر رہے تھے۔
جیسے ہی سینڈرا نے حاضرین سے خطاب شروع کیا، ان کا ننھا بیٹا اچانک اسٹیج سے نیچے جانے کے لیے آگے بڑھا۔ ٹرمپ نے فوراً ہاتھ بڑھا کر بچے کو روک لیا اور ہنستے ہوئے کہا، ’میں نہیں چاہتا کہ یہ بائیڈن کی طرح اسٹیج سے گر جائے۔‘
صدر کے اس جملے پر تقریب میں موجود افراد قہقہوں اور تالیوں سے گونج اٹھے۔
بعد ازاں سینڈرا نے ٹرمپ سے کہا، ’جناب صدر! یہ آپ سے کچھ کہنا چاہتا ہے۔ اس پر ‘ ٹرمپ نے مسکراتے ہوئے جواب دیا، ’جی، شکریہ، بہت شکریہ۔‘
ننھے بچے نے پہلے اپنی معصوم زبان میں کچھ الفاظ ادا کیے، جس کے بعد اس کی والدہ نے آہستگی سے اسے کہا، ’میرے ٹرمپ اکاؤنٹ کے لیے شکریہ ادا کرو۔‘
بچے نے پھر مائیکروفون پر صاف الفاظ میں کہا، ’میرے ٹرمپ اکاؤنٹ کے لیے شکریہ۔ اس ‘پر حاضرین نے زور دار تالیاں بجائیں، جبکہ ٹرمپ نے بھی مسکراتے ہوئے بچے کی حوصلہ افزائی کی اور تالیاں بجا کر کہا، ’شاباش، بہت اچھا۔‘
تقریب کے آغاز میں ٹرمپ نے خاندان کا تعارف کراتے ہوئے بتایا کہ سینڈرا لاس ویگاس کے ایک کیسینو میں ویٹریس ہیں، جبکہ ان کے شوہر بریڈ لاس ویگاس میٹروپولیٹن پولیس ڈیپارٹمنٹ میں پولیس افسر کے طور پر خدمات انجام دے رہے ہیں۔
ٹرمپ کے مطابق اس جوڑے کو ان کی انتظامیہ کی ٹیکس پالیسیوں سے فائدہ پہنچا ہے اور وہ اپنے دونوں بچوں کے لیے ٹرمپ اکاؤنٹس میں سرمایہ کاری بھی کر رہے ہیں۔
خاندان کو اسٹیج پر خوش آمدید کہتے ہوئے امریکی صدر نے کہا، ’یہ ایک خوبصورت خاندان ہے۔‘
واضح رہے کہ ڈونلڈ ٹرمپ خود پانچ بچوں کے والد اور 11 پوتے پوتیوں اور نواسے نواسیوں کے دادا / نانا ہیں۔
