چین میں تیار کردہ مسافر بردار طیارے سی 919 نے اپنی پہلی باقاعدہ بین الاقوامی کمرشل پرواز کامیابی سے مکمل کرلی۔ ایئر چائنا کی پرواز سی اے 723 نے 12 اگست کو بیجنگ کے کیپیٹل انٹرنیشنل ایئرپورٹ سے اڑان بھری اور منگولیا کے نئے اولان باتر ایئرپورٹ پر بحفاظت لینڈنگ کی۔
سی 919 چین کا پہلا مقامی طور پر تیار کردہ بڑا مسافر بردار طیارہ ہے، جسے بین الاقوامی فضائی معیار کے مطابق تیار کیا گیا ہے۔ طیارے کے منصوبے کا آغاز 2007 میں ہوا، جبکہ نومبر 2015 میں پہلا سی 919 اسمبلی لائن سے باہر آیا۔
یہ بھی پڑھیں:مصنوعی ذہانت کے مشورے پر عمل، چینی کسان کی 25 ایکڑ فصل تباہ
طیارے نے 2017 میں پہلی کامیاب آزمائشی پرواز کی، جس کے بعد مختلف مقامات اور انتہائی موسمی حالات میں متعدد آزمائشی پروازیں کی گئیں۔ ان تجربات میں شدید گرمی، زیادہ نمی، سخت سردی، تیز ہواؤں اور برف جمنے جیسے حالات شامل تھے۔
سی 919 کو ستمبر 2022 میں ٹائپ سرٹیفکیٹ جاری کیا گیا، جبکہ اسی سال نومبر میں اسے پروڈکشن سرٹیفکیٹ مل گیا، جس کے بعد اس کی بڑے پیمانے پر پیداوار کی راہ ہموار ہوئی۔ دسمبر 2022 میں پہلا طیارہ چائنا ایسٹرن ایئرلائنز کے حوالے کیا گیا۔
✈️#China's domestically developed #C919 large passenger aircraft landed safely in Ulan Bator, capital of #Mongolia, on Wednesday afternoon. The plane, Air China's CA723, was greeted with a water salute. The flight from Beijing marked the opening of C919's first international… pic.twitter.com/93TuRB1C6S
— CCTV Asia Pacific (@CCTVAsiaPacific) August 12, 2026
سی 919 نے مئی 2023 میں شنگھائی سے بیجنگ کے درمیان اپنی پہلی باقاعدہ کمرشل پرواز مکمل کرکے چینی سول ایوی ایشن مارکیٹ میں باضابطہ طور پر قدم رکھا۔ بعد ازاں طیارے نے ہانگ کانگ، مکاؤ، تبت اور چین کے دیگر علاقوں تک بھی پروازیں شروع کیں۔
کمرشل ایئرکرافٹ کارپوریشن آف چائنا (COMAC) کے مطابق 10 اگست 2026 تک سی 919 مجموعی طور پر 25 شہروں کو ملانے والے 57 فضائی روٹس پر خدمات انجام دے چکا تھا اور 75 لاکھ سے زائد مسافروں کو سفر کرا چکا تھا۔
منگولیا کی پرواز سی 919 کے لیے ایک اہم سنگ میل ہے، کیونکہ اس کے ذریعے چینی ساختہ طیارے نے پہلی مرتبہ باقاعدہ بین الاقوامی کمرشل سروس کا آغاز کیا ہے۔
