نیشنل ڈیٹابیس اینڈ رجسٹریشن اتھارٹی (نادرا) نے گزشتہ روز 14 اگست کے موقع پر پاکستان میں تیار کردہ کیو آر کوڈ پر مبنی چِپ کے بغیر نیا قومی شناختی کارڈ مرحلہ وار جاری کرنے کا آغاز کردیا ہے۔
نادرا ملک اور بیرون ملک مقیم پاکستانیوں کو قومی شناختی کارڈ اور دیگر شناختی دستاویزات جاری کرنے والا مجاز ادارہ ہے۔ نئے کارڈ میں چِپ کے بجائے کیو آر کوڈ ٹیکنالوجی استعمال کی گئی ہے، جس کے ذریعے شناختی دستاویزات کے نظام کو مزید جدید بنایا جا رہا ہے۔
مزید پڑھیں: جعلی شناختی دستاویزات کے خلاف کارروائی، 741 افراد نادرا کے ریڈار پر
نادرا کے مطابق کیو آر کوڈ پر مبنی نیا شناختی کارڈ ابتدائی مرحلے میں موجودہ چِپ کے بغیر والے ٹیسلن شناختی کارڈ کی جگہ مرحلہ وار جاری کیا جا رہا ہے۔
1/6
An important step towards self-reliance and easier digital verification!
NADRA has introduced a new chipless, QR code-based National Identity Card, manufactured in Pakistan by the National Security Printing Company (NSPC), Karachi. pic.twitter.com/15qRzx6Suy— NADRA (@NadraPak) August 14, 2026
اس عمل کو مزید وسعت دیتے ہوئے جنوری 2027 سے کیو آر کوڈ پر مبنی نیا شناختی کارڈ NICOP اور جووینائل کارڈ سمیت قومی شناختی کارڈ کی تمام اقسام کے لیے جاری کیا جائےگا۔
بعد ازاں آخری مرحلے میں پاکستان اوریجن کارڈ (پی او سی) کو بھی چِپ کے بغیر کیو آر کوڈ پر مبنی نئے شناختی کارڈ میں منتقل کردیا جائے گا۔
کیا پرانے شناختی کارڈ ختم ہوجائیں گے؟
نئے شناختی کارڈ کے اعلان کے بعد شہریوں کی جانب سے یہ سوال کیا جارہا ہے کہ کیا کیو آر کوڈ پر مبنی نئے کارڈ کے اجرا کے ساتھ پہلے سے جاری کیے گئے نادرا کے تمام شناختی کارڈ غیر مؤثر ہوجائیں گے؟
نادرا نے اس حوالے سے واضح کردیا ہے کہ نئے چِپ لیس شناختی کارڈ کے اجرا سے پہلے سے جاری شدہ شناختی کارڈ ختم نہیں ہوں گے۔
اتھارٹی کے مطابق موجودہ شناختی کارڈ اپنی مقررہ تاریخِ میعاد تک بدستور قابلِ استعمال اور قانونی طور پر کارآمد رہیں گے۔ شہریوں کو صرف نئے نظام کے آغاز کی وجہ سے اپنا موجودہ شناختی کارڈ فوری طور پر تبدیل کرانے کی ضرورت نہیں ہوگی۔
مزید پڑھیں: افغان شہریوں کے لیے جعلی شناختی کارڈز بنانے والوں کا نیٹ ورک بے نقاب، نادرا افسران سمیت 4 گرفتار
یوں نئے کیو آر کوڈ پر مبنی شناختی کارڈ کا اجرا موجودہ کارڈز کو فوری طور پر منسوخ کرنے کے بجائے مرحلہ وار منتقلی کا عمل ہے۔
