کراچی میں قربانی کے لیے خریدی گئی گائے چوری کرنے والوں نے ہنڈا سوک استعمال کی مگر زیادہ عرصہ اپنا جرم باقی نہ رکھ سکے۔
کراچی پولیس کے مطابق شاہراہ فیصل پولیس نے کارروائی کرتے ہوئے دو روز قبل چوری ہونے والی گائے برآمد کر لی۔
اے ایس پی شاہراہ فیصل ظفر صدیق چھانگا کے مطابق دو روز قبل گلستان جوہر تھانے کی حدود سے نامعلوم ملزمان گائے چوری کر کے لے گئے تھے۔
پولیس افسر کے مطابق واقعہ کا مقدمہ درج کرکے گائے کی تلاش شروع کردی گئی تھی۔ منگل کی صبح لیاقت آباد سے گائے برآمد کر لی گئی۔
اے ایس پی کے مطابق گائے چوری میں ملوث ملزم شہاب مسرور فرار ہوگیا ہے جس کی تلاش جاری ہے۔
گائے ملنے پر شہری کی جانب سے پولیس کا شکریہ بھی ادا کیا گیا۔
