وفاقی وزیر صحت مصطفیٰ کمال نے کہا ہے کہ پمز اسپتال پر مریضوں کے بوجھ کو کم کرنے کے لیے ٹیلی میڈیسن سینٹر کا آغاز کیا جائےگا۔
وزیر صحت ڈاکٹر مصطفیٰ کمال نے پمز اسپتال کا دورہ کیا، جہاں اعلیٰ سطحی اجلاس منعقد ہوا۔ اجلاس میں اسپتالوں کے سربراہان، ایڈیشنل سیکریٹری صحت، جوائنٹ سیکریٹری اسپتال، ڈی جی ہیلتھ اور ڈی ایچ او اسلام آباد نے شرکت کی۔
مزید پڑھیں: پمز میں 14 بچوں کی ہلاکت: ذمہ دار افسران کے خلاف فوجداری مقدمہ تاحال درج نہ ہوسکا
اجلاس میں سرکاری اسپتالوں میں فائر سیفٹی آڈٹ کی پیشرفت اور اس حوالے سے کیے جانے والے اقدامات کا جائزہ لیا گیا۔
اجلاس میں پمز اسپتال میں کولنگ سسٹم کو یقینی بنانے کے لیے ایچ ویک کے نظام کا بھی جائزہ لیا گیا۔
وزیر صحت مصطفیٰ کمال نے ہدایت کی کہ چلڈرن اسپتال میں کولنگ سسٹم کو یقینی بنانے کے لیے ایچ ویک کے نظام کو ایمرجنسی بنیادوں پر یقینی بنایا جائے۔
مصطفیٰ کمال نے کہاکہ پمز اسپتال پر مریضوں کے بوجھ کو کم کرنے کے لیے ٹیلی میڈیسن سینٹر کا آغاز کیا جائے گا۔
وزیر صحت نے سی آئی او ہیلتھ کارڈ کو پمز پر مریضوں کا بوجھ کم کرنے کے لیے وزیراعظم ہیلتھ کارڈ کی سہولیات کے بارے میں آگاہی مہم چلانے کی ہدایت کی۔
مصطفیٰ کمال نے کہاکہ ہیلتھ کارڈ کے تحت اسلام آباد میں پینل پر موجود 15 اسپتالوں میں شہریوں کو مفت اور معیاری طبی سہولیات دستیاب ہیں۔
انہوں نے کہاکہ اسلام آباد، آزاد جموں و کشمیر اور گلگت بلتستان کے شہری وزیراعظم ہیلتھ کارڈ کے تحت پینل اسپتالوں سے مفت علاج کی سہولت حاصل کر سکتے ہیں۔
مزید پڑھیں: پمز آتشزدگی: 1122 پر کال موصول ہوتے ہی ریسکیو فائر بریگیڈ کی گاڑی 6 منٹ میں اسپتال کیسے پہنچی؟
وزیر صحت نے ہدایت کی کہ وزیراعظم ہیلتھ کارڈ کے پینل پر موجود 15 اسپتالوں سے علاج کی مفت سہولت حاصل کرنے کے لیے بھرپور آگاہی دی جائے۔
بعد ازاں وزیر صحت نے نیو ایمرجنسی کے مختلف شعبوں کا دورہ کیا اور نیو ایمرجنسی کو ہنگامی بنیادوں پر آپریشنل کرنے کی ہدایت کی۔
