ان دنوں پاکستانی اداکارہ حمائمہ ملک کا ایک بیان سوشل میڈیا پر خوب وائرل ہو رہا ہے جس میں وہ بالی ووڈ اداکار عمران ہاشمی کی تعریفوں کے پُل باندھتی نظر آتی ہیں۔
حمائمہ ملک کا ڈیجیٹل میڈیا کو دیے گئے ایک انٹرویو میں کہنا تھا کہ عمران ہاشمی میرے بہت اچھے دوست اور بے حد اچھے انسان ہیں۔
اداکارہ کے مطابق عمران ہاشمی کو قرآن کی ساری آیتیں یاد ہیں، وہ با عمل مسلمان ہیں اور ان کا دل پاک ہے۔ پاکستانی عوام نے تنقید کر کےعمران ہاشمی کے سارے گناہ دھودیے ہیں۔
اداکارہ حمائمہ ملک کا کہنا تھا ’ میں سوشل میڈیا پر لنچ، ڈنر یا عمرہ کی پوسٹ بھی لگاؤں تو مجھے کمنٹ میں کہا جاتا ہے کہ تمہیں عمران ہاشمی تو یاد نہیں آ رہا؟‘
اداکارہ حمائمہ ملک کے بیان کے بعد سوشل میڈیا صارفین نے ان کو آڑے ہاتھوں لیا اور شدید تنقید کا نشانہ بنایا۔
طلحہ ہاشمی نامی صارف لکھتے ہیں کہ اداکارہ حمائمہ ملک کی عمران ہاشمی کے حق میں گواہی کے بعد اب کوئی شبہ نہیں رہ جاتا۔
ایک صارف نے بولڈ سینز کے لیے مشہور اداکار کے بارے میں لکھا کہ مذہبی ہوتے ہوئے عمران ہاشمی کا یہ حال ہے، اگر وہ مذہبی نہ ہوتے تو فلموں میں انہوں نے کیا کرنا تھا۔
یاد رہے کہ 2014 میں عمران ہاشمی اور حمائمہ ملک نے بالی ووڈ کی فلم ’راجہ نٹورلال‘ میں ایک ساتھ اداکاری کی تھی۔
