اسلام آباد اور راولپنڈی میں انٹرنیٹ سروس بحال، کیا خرابی ہوئی تھی؟ شزا فاطمہ نے بتا دیا

اسلام آباد اور راولپنڈی سمیت گردونواح میں قریباً 3 گھنٹے کی بندش کے بعد انٹرنیٹ سروس مکمل طور پر بحال ہوگئی۔

اتوار کی صبح تقریباً 9 بجے جڑواں شہروں میں اچانک انٹرنیٹ سروس بند ہوگئی تھی، جس کے باعث موبائل فون اور فائبر انٹرنیٹ سروس متاثر ہوئی۔

انٹرنیٹ کی بندش کے باعث اتوار کو کام کرنے والے بعض دفاتر میں سرگرمیاں متاثر ہوئیں، جبکہ فوڈ سروسز، ٹیکسی اور بائیکیا چلانے والے افراد کو بھی مشکلات کا سامنا کرنا پڑا۔ متعدد اہم ایپس کی سروس متاثر ہونے سے صارفین بھی پریشانی کا شکار رہے۔

دورانِ بندش انٹرنیٹ سروس سے متعلق مختلف افواہیں بھی گردش کرتی رہیں اور شہری فون پر ایک دوسرے سے صورتحال معلوم کرتے رہے، جبکہ سوشل میڈیا پر بھی اس حوالے سے مختلف تبصرے سامنے آتے رہے۔

وفاقی وزیر برائے انفارمیشن ٹیکنالوجی شزا فاطمہ نے انٹرنیٹ سروس میں تعطل کی وضاحت کرتے ہوئے ایکس پر بتایا تھا کہ ٹیکسلا اور گوجر خان کے علاقوں میں فائبر کیبل دو مقامات سے کٹ گئی تھی، جس کے باعث اسلام آباد اور راولپنڈی میں سروسز متاثر ہوئیں۔

Today there was dual Fiber cut in general area Taxila/GujarKhan, impacting services in Pindi/Islamabad , one site has been repaired with most services restored, while second repair is underway.#Internet

— Shaza Fatima Khawaja (@ShazaFK) September 27, 2026

وفاقی وزیر کے مطابق ایک مقام پر خرابی دور کرکے زیادہ تر سروس بحال کردی گئی تھی جبکہ دوسرے مقام پر مرمت کا کام جاری تھا، تاہم اب دونوں مقامات پر خرابی دور ہونے کے بعد انٹرنیٹ سروس مکمل طور پر بحال ہوگئی ہے۔

All repaired. services restored.

— Shaza Fatima Khawaja (@ShazaFK) September 27, 2026

واضح رہے کہ پاکستان تحریک انصاف کے لانگ مارچ کے باعث، جو اب ملتوی ہوچکا ہے، انٹرنیٹ سروس بند کیے جانے کا امکان ظاہر کیا جارہا تھا۔

اسی تناظر میں سوشل میڈیا پر یہ تبصرے بھی سامنے آئے کہ اتوار کو سروس بند کرنے کی ہدایت دینے والے متعلقہ شعبے کو شاید لانگ مارچ ملتوی ہونے کا علم نہیں تھا۔