وفاقی وزیراطلاعات و نشریات مریم اورنگزیب نے کہا ہے کہ آئی ایم ایف سے سمجھوتہ قریب ہونے کی خبرسنتے ہی تخریب کاروں، سازشیوں اور ملک دشمنوں کا رونا پیٹنا پھر شروع ہوگیا ہے، نواز شریف ملکی معیشت مستحکم کر کے گئے تھے، فارن ایجنٹ نے معیشت کی بنیادیں ہلائیں اور ملک دوبارہ آئی ایم ایف کے پاس گیا۔
اتوار کو اپنے بیان میں مریم اورنگزیب نے کہا کہ معاشی بارودی سرنگیں بچھانے، ملک دیوالیہ کرنے اور عوام کی روٹی روزی پر ڈاکہ ڈالنے والے فارن ایجنٹ آج اسحاق ڈار سے استعفیٰ مانگ رہے ہیں ،عوام کے پیٹ پر مہنگائی کے پتھر باندھنے والے بے شرم مجرم ملکی معیشت سنبھالنے والے اسحاق ڈار سے استعفیٰ مانگ رہے ہیں۔
مزید پڑھیں
انہوں نے کہا کہ معیشت کا دھڑن تختہ کرنے والے اپنے ہی کیے ہوئے آئی ایم ایف معاہدے کو بحال ہوتے دیکھ کر رو کیوں رہے ہیں؟ 9 مئی کو ملک جلایا، فوجی ونجی املاک پر حملے کیے، شہدا کی یادگاروں کی بے حرمتی کی، اب معاشی مفادات پر حملے کی پھر تیاری ہے۔
انہوں نے کہا کہ آئی ایم ایف سے سمجھوتہ قریب ہونے کی خبرسنتے ہی تخریب کاروں، سازشیوں اور ملک دشمنوں کا رونا پیٹنا پھر شروع ہوگیا ہے، سخت شرائط پہ آئی ایم ایف کا معاہدہ کیا، خود خلاف ورزی کی، اپنا کیا ہوا معاہدہ توڑا، پھر ملک اور معاہدے کے خلاف سازشیں بھی کیں، معاہدہ ہونے پہ چیخنے والوں سے سوال یہ پوچھنا چاہیے کہ آپ نے آئی ایم ایف سے معاہدہ کیا کیوں تھا جو معاہدہ ہونے پر چیخ رہے ہیں۔
مریم اورنگزیب کا کہنا تھا کہ آئی ایم ایف سے معاہدہ خود انہوں نے ہی توکیا تھا، اس معاہدے کو نہ صرف خود توڑابلکہ ملک کو ڈیفالٹ کرانے کی سازش کی تھی۔
وفاقی وزیر نے کہا کہ نواز شریف واحد لیڈر ہیں جن کی حکومت نے آئی ایم ایف پروگرام مکمل کیا اور ملک کو ترقی کی راہ پر بھی ڈالا۔ “مر جاؤں گا آئی ایم ایف نہیں جاؤں گا “ کون کہتا تھا؟ پھر وہ آئی ایم ایف کیوں گیا؟۔
آئی ایم ایف نے بجٹ مسترد کر دیا، اسحاق ڈار استعفیٰ دیں، شاہ محمود قریشی
واضح رہے کہ وائس چیئرمین پاکستان تحریک انصاف (پی ٹی آئی) شاہ محمود قریشی نے اتوار کو میڈیا سے گفتگو کرتے ہوئے کہا تھا کہ آئی ایم ایف نے بجٹ مسترد کر دیا ہے، عالمی مالیاتی ادارے کو اس حکومت پر اعتماد ہی نہیں ہے اس لیے وزیر خزانہ اسحاق ڈار کو استعفٰی دے دینا چاہیے۔
سابق وزیر خارجہ شاہ محمود قریشی نے کہا کہ اس حکومت نے 1500 ارب کا پاکستانیوں پر مزید بوجھ ڈال دیا ہے، گزشتہ روز 215 ارب کے مزید ٹیکسز کی نوید قوم کو سنائی گئی ہے پھر بھی آئی ایم ایف ریونیو ٹارگٹ سے مطمئن نہیں ہے۔
