افواجِ پاکستان کی دفاعی کارروائیوں اور دہشتگردی کے خلاف جنگ پر تنقید کرنے والوں کو سوچنا چاہیے کہ ملک کا دفاع صرف دعووں سے نہیں بلکہ عملی اقدامات اور قربانیوں سے ممکن ہوتا ہے۔ بھارتی پائلٹ ابھی نندن کی گرفتاری اور بھارتی طیارے گرائے جانے کے واقعات پوری دنیا نے دیکھے، اس کے باوجود ان واقعات کو ڈراما قرار دینا حقائق کو نظرانداز کرنے کے مترادف ہے۔
پاکستان کو دہشتگردی کے مسلسل خطرات کا سامنا ہے اور کالعدم تحریک طالبان پاکستان کے سرحد پار ٹھکانوں کا معاملہ بھی اہم ہے۔ اقوام متحدہ کی رپورٹس اور عالمی شواہد میں ان ٹھکانوں کا ذکر سامنے آتا رہا ہے، ایسے میں دہشتگردی کے خلاف کارروائیوں اور ملک کے دفاع کو سیاسی عینک سے دیکھنے کے بجائے زمینی حقائق کو سمجھنے کی ضرورت ہے۔
تقریباً 2600 کلومیٹر طویل سرحد کی حفاظت کوئی آسان کام نہیں۔ دشوار گزار پہاڑی علاقوں اور منفی 15 ڈگری تک درجہ حرارت میں فوجی جوان سرحدوں کی نگرانی اور حفاظت کرتے ہیں۔ سرحدی باڑ کی تنصیب اور اس کے مؤثر انتظام کے لیے غیر معمولی محنت اور وسائل درکار ہوتے ہیں۔
امریکا جیسے ملک کو بھی اپنی سرحدوں کی مکمل نگرانی اور حفاظت میں مشکلات کا سامنا رہا ہے، ایسے میں پاکستان کے سرحدی حالات اور فوجی جوانوں کی مشکلات کو نظرانداز نہیں کیا جا سکتا۔
ملک کے دفاع کا مقصد شہریوں کی جان و مال اور قومی سلامتی کا تحفظ ہے۔ اس لیے افواجِ پاکستان پر تنقید کرنے والوں کو یہ بھی سوچنا چاہیے کہ دہشتگردی کے خلاف جنگ میں جانیں دینے والے جوان کن حالات میں فرائض انجام دیتے ہیں اور ان کی قربانیوں کی اہمیت کیا ہے۔
