وزیر خارجہ بلاول بھٹو زرداری نے عالمی برادری کو نفرت، امتیازی سلوک، عدم برداشت کے رویوں کے خلاف متحد ہونے اور باہمی احترام، افہام و تفہیم اور رواداری کو فروغ دینے پر زور دیا ہے۔
قرآن پاک کی بے حرمتی کے واقعے سمیت مذہبی منافرت پھیلانے والے واقعات پر انسانی حقوق کونسل کی جانب سے منعقدہ ایک ہنگامی اجلاس سے ورچوئل خطاب کرتے ہوئے وزیر خارجہ نے کہا کہ بدقسمتی سے قرآن پاک کی دانستہ بے حرمتی کے واقعات جاری ہیں۔
انہوں نے کہا کہ یہ کارروائیاں زیادہ سے زیادہ نفرت پھیلانے کے لیے انجام دی گئی ہیں۔ ہمیں نفرت، امتیازی سلوک اور تشدد کو بھڑکانے کی کوششوں پر نظر رکھنی چاہیے۔ ہمیں مل کر اس کی مذمت کرنی چاہیے، ہمیں نفرت پھیلانے والوں کو الگ تھلگ کرنا چاہیے۔
بلاول بھٹو نے کہا کہ 3 ماہ قبل اسلامو فوبیا سے نمٹنے کا پہلا بین الاقوامی دن منایا گیا جبکہ اقوام متحدہ کی جنرل اسمبلی میں اس موقع پر پہلا اجلاس منعقد کیا گیا تھا۔
انہوں نے کہا کہ قرآن کی بے حرمتی کے عوامی اور سوچے سمجھے عمل سے مسلمانوں کو پہنچنے والے گہرے دکھ کو سمجھنا ضروری ہے۔
بلاول بھٹو زرداری نے قرآن پاک کی بے حرمتی کو مسلمانوں کے عقیدے پر حملہ قرار دیتے ہوئے کہا کہ روک تھام اور احتساب کے لیے اس کونسل کے سامنے پیش کیے گئے مسودے کے متن میں مطالبہ معقول اور ضروری تھا۔
انہوں نے کہا کہ نفرت انگیز تقریر اور آزادانہ تقریر کو الگ الگ کیا جانا چاہیے کیونکہ آزادی اظہار اتنا ہی ناگزیر ہے جتنا نفرت انگیز تقریر ناقابل دفاع ہے۔
وزیر خارجہ نے کہا کہ دنیا میں ایک بھی مسلم ملک ایسا نہیں ہے جو دوسرے مذاہب کے مقدسات کی بے حرمتی کی اجازت دیتا ہو، انہوں نے مزید کہا کہ اس طرح کا عمل کسی بھی مسلمان کے لیے ناقابل تصور ہے۔
