پی ٹی آئی پارلیمنٹیرین کے صدر پرویز خٹک اور سابق وزیراعلیٰ محمود خان نے کہا ہے کہ ہمارا فیصلہ پاکستان کے مفاد میں ہوگا۔
نئی جماعت پی ٹی آئی پارلیمنٹیرینز کے وجود میں آنے کے بعد ایک ویڈیو پیغام میں پرویز خٹک نے کہا ہے کہ چیئرمین پی ٹی آئی نے بار بار الیکشن کی پیشکش کو قبول کیوں نہیں کیا جس دن یہ راز کھل گیا سب کی آنکھیں کھلی کی کھلی رہ جائیں گی۔
پی ٹی آئی نے کیوں الیکشن کا وقت ضائع کیا؟ یہ بڑا راز ہے، یہ راز جس دن کھلے گا سب کی آنکھیں کھلی کی کھلی رہ جائیں گی, پرویز خٹک pic.twitter.com/DSQggq3HEE
— WE News (@WENewsPk) July 17, 2023
ان کا کہنا تھا کہ چیئرمین پی ٹی آئی کو بار بار الیکشن کی پیشکش کی گئی، سب کو سوچنا چاہیے کہ پاکستان جمہوری ملک ہے اور الیکشن ہونے چاہییں۔
پرویز خٹک نے کہا کہ نئی سیاسی جماعت کے منشور اور جھنڈے سے متعلق جلد مشاورت کے بعد اعلان کریں گے۔
انہوں نے کہا کہ ہم نے مشاورت کے بعد نئی سیاسی پارٹی کی بنیاد رکھنے کا فیصلہ کیا۔ آج ہم اسی حوالے سے اکٹھے ہوئے تھے جس میں سابق ارکان قومی و صوبائی اسمبلی شامل تھے۔
یہ بھی پڑھیں پرویز خٹک نے پی ٹی آئی پارلیمنٹیرینز کے نام سے نئی سیاسی جماعت بنا لی، 57 سابق ارکان اسمبلی شامل
واضح رہے کہ سابق وزیر اعلٰی و وزیر دفاع پرویز خٹک نے نئی جماعت کا اعلان کر دیا ہے، جسکا نام پی ٹی آئی پارلیمنٹیرینزرکھا گیا ہے، پرویز خٹک کی جانب سے بنائی جانے والی نئی جماعت میں پاکستان تحریک انصاف ( پی ٹی آئی) کی سابق وزیر اعلٰی محمود خان بھی شامل ہو گئے، جبکہ 57 قومی و صوبائی ارکان اسمبلی بھی نئی جماعت میں شامل ہوچکے ہیں۔
پی ٹی آئی کے سابق وزیراعلیٰ خیبر پختونخوا محمود خان سمیت سابق ایم این اے صالح محمد خان، صوبائی وزیراشتیاق ارمڑ، ضیا اللہ بنگش، ارباب وسیم، ملک واجد علی، افتخار مشوانی اور شوکت علی نئی پارٹی کا حصہ ہیں۔
