پشاور میں یوم عاشور کے تمام ماتمی جلوس پُرامن طور پر اختتام پذیر ہو گئے۔ شہر میں ممجموعی طور پر 12 جلوس ذوالجناح برآمد ہوئے۔ جس کے لیے سیکیورٹی کے سخت انتظامات کیے گئے تھے۔ اندرون شہر کو مکمل طور پر سیل کیا گیا تھا۔
یوم عاشور کے موقع پر پشاور میں چھوٹے بڑے 12 ماتمی جلوس نکالے گئے۔ تمام جلوس اندرونِ شہر کے امام بارگاہوں سے نکالے گئے۔ جلوس اپنے اپنے قدیمی راستوں سے ہوتے ہوئے واپس اپنی اپنی امام بارگاہ پہنچ کر پُرامن طور پر اختتام پذیر ہو گئے۔
عزاداروں نے کربلا میں امام حسینؓ کی عظیم شہادت پر خراج تحسین پیش کیا۔ جب کہ نماز مغرب کے بعد امام بارگاہوں میں مجلس شام غریباں کا سلسلہ جاری ہے۔
سخت سیکیورٹی، اندرون شہر سیل
یوم عاشور کے ماتمی جلوسوں کے لیے پولیس کی جانب سے سخت انتظامات کیے گئے تھے۔ موبائل سروس جزوی طور پر معطل ہے۔ جلوسوں کی گزرگاہوں کو بی ڈی یو کی مدد سےکلئیر کیا گیا ہے۔ جبکہ کوہاٹی چوک میں قائم سپریم کمانڈ پوسٹ سے سی سی ٹی وی کیمروں سے مکمل نگرانی کی جا رہی تھی۔اس کے علاوہ اندرون شہر دیگر6 مختلف مقامات پر بھی سب کمانڈ پوسٹس قائم تھیں۔
شہر کی تمام اونچی عمارتوں پر ماہر نشانہ بازتعینات ہیں، پولیس حکام کے مطابق شہر کے داخلی و خارجی راستوں پر چیکنگ کا عمل مزید سخت کیا گیا ہے۔تمام امام بارگاہوں، جلوسوں، مجالس اور دیگر اہم وحساس مقامات کی مانیٹرنگ کی گئی۔
روز عاشورہ پر 955 عزاداروں کو طبعی امداد دی گئی، ریسکیو
یوم عاشور پر ریسکیو 1122 کی ٹیمیں موجود تھیں، جنہوں نے مجموعی طور پر 955 سے زائد عزاداروں کو طبی امداد فراہم کی۔ جبکہ 186 عزاداروں کو ریسکیو ایمبولینس میں ہسپتال منتقل کیا گیا۔
