پاکستان منرلز سمٹ – ڈسٹ ٹو ڈیویلپمنٹ آج اسلام آباد میں منعقد ہوگی۔ وزیراعظم شہبازشریف مہمان خصوصی اور چیف آف آرمی سٹاف جنرل سید عاصم منیر مہمان اعزاز ہوں گے۔
گرین پاکستان اور آئی ٹی سیمینار کے کامیاب انعقاد کے بعد پاکستان منرلز سمٹ، ڈسٹ ٹو ڈیویلپمنٹ کا انعقاد اسلام آباد میں آج کیا جا رہا ہے۔
بیرونی سرمایا کاروں کے لیے سپیشل انویسٹمنٹ فیسیلیٹیشن کونسل (SIFC) کے قیام سے پاکستان میں ترقی کے ایک سنہری دور کا آغاز ہوچکا ہے۔ چیف آف آرمی سٹاف اور حکومت پاکستان نے (SIFC) کا قیام عمل میں لا کر پاکستان کو تیز تر ترقی کے نئے دور میں شامل کرنے کا عزم کر رکھا ہے۔ قدرتی وسائل سے مالا مال پاکستان مستقبل کے ترقی یافتہ ممالک کی صف میں شامل ہونے کے لیے تیارہے۔
زراعت، لائیوسٹاک، انفارمیشن ٹیکنالوجی اور معدنیات کے میدان میں جدید طریقہ کار سے آراستہ ٹیکنالوجی کا استعمال کرکے پاکستان کی تیز تر ترقی کو یقینی بنایا جائے گا۔
سیمینار میں ماہر معدنیات اور غیر ملکی سرمایہ کاروں کی بڑی تعداد سمیت سعودی عرب اور دیگر ممالک سے سرمایہ کار شرکت کر رہے ہیں۔
سیمینار کے انعقاد سے پاکستان میں 6 لاکھ مربع کلو میٹر تک پھیلے معدنیات بشمول کوئلہ، کاپر، سونا، زنک، ماربل کی 90 اقسام اور نمک کے ذخائر کو جدید اور تیز تر کان کنی کے ذرائع استعمال کر کے ملکی برآمدات میں بھر پور اضافہ کرنے کے مواقع میسر آئیں گے۔
