یوکرین اور روس کے تنازع پر 40 سے زائد ملکوں اورعالمی تنظیموں کے نمائندوں اور قومی سلامتی کے مشیروں کا سعودی عرب کے شہر جدہ میں منعقدہ اجلاس میں ایسی مشترکہ بنیاد قائم کرنے کے لیے عالمی مشاورت اور نقطہ نظر کے تبادلے کا سلسلہ جاری رکھنے پر اتفاق کیاگیا ہے جس سے امن کی راہ ہموار ہو۔
اجلاس کی صدارت سعودی وزیرمملکت اور قومی سلامتی کے مشیر ڈاکٹر مساعد محمد العیبان نے کی ۔ شرکا نے یہ اجلاس بلانے اور اس کی میزبانی کرنے پر سعودی عرب کی قیادت سے اظہار تشکر کیا۔
اجلاس میں ارجنٹائن، آسٹریلیا، بحرین،برازیل، بلغاریہ، کینیڈا، چلی،چین، جمہوریہ چیک، ڈنمارک،مصر، استونیا،اقوام متحدہ، یورپی کمیشن، یورپین کونسل،یونین آف کوموروس، فن لینڈ،فرانس، اٹلی، جاپان، اردن، انڈونیشیا، اٹلی، جاپان، کویت،سپین، لیٹویا،لیتھونیا، ہالینڈ، ناروے،پولینڈ،قطر، کوریا،رومانیہ، جنوبی افریقہ ،سویڈن ،ترکی،یوکرین،متحدہ عرب امارات، برطانیہ، امریکہ نے شرکت کی۔
یہ اجلاس سعودی ولی عہد محمد بن سلمان بن عبدالعزیز السعود کی جانب سے یوکرین اور روس کے مابین تنازع کے حل کے لیے مارچ 2022 سے جاری کوششوں کا حصہ تھا۔
اجلاس میں ایسی مشترکہ بنیاد قائم کرنے کےلیے عالمی مشاورت اور نقطہ نظر کے تبادلے کا سلسلہ جاری رکھنے پر اتفاق کیاگیا جس سے امن کے لیے راہ ہموار ہو۔ شرکا نے اجلاس کے دوران سامنے آنےوالے آراء اور مثبت تجاویز سے استفادے کی اہمیت پر بھی زور دیا۔
