آرمی چیف جنرل سیّد عاصم منیر نے کہا ہے کہ پاکستانی فوج موجودہ اور ابھرتے ہوئے چیلنجز سے آگاہ ہے اور اس کے پاس تمام پہلوؤں کے مطابق اپنے دشمنوں کے مذموم عزائم کو ناکام بنانے کی صلاحیت موجود ہے۔
پاک فوج کے شعبہ تعلقات عامہ (آئی ایس پی آر) کے مطابق آرمی چیف جنرل سید عاصم منیر نے بدھ کو جہلم کے قریب ٹلہ فیلڈ فائرنگ رینجز کا دورہ کیا۔
آرمی چیف نے لائیو فائر اور ٹینکوں کی مشقوں، لانگ رینج ایس ایچ ، 15 آرٹلری گنوں کی گولہ باری صلاحیتوں اور جدید آلات کی نمائش کا مشاہدہ کیا۔
آئی ایس پی آر کے مطابق آرمی چیف نے عملے کی جنگی مہارت اور جدید ترین ہتھیاروں پر ان کی مہارت کو سراہا۔
آرمی چیف نے اعلیٰ درجے کی پیشہ وارانہ مہارت پر سٹرائیک کور کے دستوں کی طرف سے دکھائے جانے والے جذبے کو سراہا۔
قبل ازیں آمد پر کمانڈر منگلا کور نے آرمی چیف کا استقبال کیا اور انہیں سٹرائیک کور کی آپریشنل تیاریوں کے بارے میں بریفنگ دی۔
