کسی بھی سیاسی رہنما یا جماعت پر پابندی نہیں لگنی چاہیے، جہانگیر ترین

استحکام پاکستان پارٹی (آئی پی پی) کے سربراہ جہانگیر ترین نے کہا ہے کہ کسی بھی سیاسی رہنما یا جماعت پر پابندی کے حق میں نہیں ہیں، انتخابات کے لیے ہماری تیاریاں مکمل ہیں، لگتا نہیں الیکشن مارچ سے آگے جائیں۔

سابق صوبائی وزیر صمصام بخاری کی استحکام پاکستان پارٹی میں شمولیت کے موقع پر پریس کانفرنس کرتے ہوئے جہانگیر ترین نے کہاکہ پارٹی میں شمولیتوں کا سلسلہ لگا تار جاری ہے، لگتا ہے اب جہاز سے بھی کام نہیں چلے گا۔

انہوں نے کہاکہ ذاتی وجوہات کی وجہ سے پارٹی مصروفیات میں تھوڑا سا وقفہ آ گیا تھا۔ ہم پورے پاکستان کے لیے کام کریں گے، سیٹوں کے حوالے سے اندازہ لگانا قبل از وقت ہو گا۔ تحریک انصاف کے لوگوں کے ساتھ تعلق ہے، وہ ہمارے ساتھ شامل ہوں گے۔ پہلے پی ٹی آئی کو منظم کیا تھا اب استحکام پاکستان پارٹی کو منظم کریں گے۔

جہانگیر ترین نے کہاکہ صدر کی ٹوئٹ پر حکومتی وزرا نے کل پریس کانفرنس کر کے حقائق سے آگاہ کر دیا ہے۔

اس موقع پر صمصام بخاری کا کہنا تھا کہ 9 مئی کو جو کچھ ہوا قابل مذمت ہے، اس واقعہ کی پرزور مذمت کرتا ہوں، پاکستان کے معاملے پر ہم سب ایک ہیں۔ پاکستان کی تمام پارٹیوں اور اداروں کو ایک پیج پر ہونا چاہیے۔

ان کا کہنا تھا کہ مجھے 9 مئی کے منصوبے کا کوئی علم نہیں تھا۔ یہ مصنوعی ذہانت کا دور ہے کوئی کچھ بھی کر سکتا ہے۔

پریس کانفرنس میں عون چوہدری، نعمان لنگڑیال، اسحاق خاکوانی، ڈاکٹر مراد راس، سعید نورانی، نوریز شکور اور دیگر موجود تھے۔

دوسری جانب ڈاکٹر جویریہ کاٸنات رضا اور تسکین خاکوانی نے بھی استحکام پاکستان پارٹی میں شمولیت اختیار کر لی ہے۔ مرکزی سیکریٹر اطلاعات فردوس عاشق اعوان نے پارٹی رومال پہنائے۔ اور سب کو خوش آمدید کہا