نگران وزیر مذہبی امور انیق احمد کا کہنا ہے معاشرے سے مایوسی کو ختم کرنا ہے کیونکہ مایوسی کفر ہے۔
میڈیا سے گفتگو کرتے ہوئے نگران وفاقی وزیر برائے مذہبی امور انیق احمد کا کہنا تھا وزیراعظم انوار الحق نے کچھ ہدایات جاری کی ہیں، ان پر عمل کرنا ہے۔
انیق احمد کا کہنا تھا’ جس طرح حرف تہجی میں س اور ش ساتھ ساتھ ہیں، اسی طرح شعیہ سنی بھی ساتھ ساتھ ہیں۔ ہمارے معاشرے سے اعتراض ختم ہو جائے تو سب ٹھیک ہو جائے‘۔
نگران وفاقی وزیر کا کہنا تھا سختیاں اور منافقت سب کو ختم ہونا چاہیے، اگلا الیکشن ساز گار ماحول میں ہونا چاہیے، قوم کو مایوسی سے نکالنا ہے کیونکہ مایوسی کفرہے۔ انہوں نے کہا’جنت کے ٹھیکیدار ہم نہیں یہ اللہ کا معاملہ ہے‘۔
وفاقی وزیر برائے مذہبی امور کا کہنا تھا’روڈ ٹو مکہ منصوبے پر کام ہو رہا ہے، ہم حجاج کی بہترین خدمت کرنا چاہتے ہیں‘۔
