پاکستان اور سعودی عرب کی انسداد دہشت گردی سے متعلق مشترکہ تربیتی مشقیں ’البتار۔ون‘اختتام پذیر ہوگئیں۔
پاک فوج کے شعبہ تعلقات عامہ (آئی ایس پی آر) سے جاری بیان کے مطابق چیراٹ میں منعقدہ اختتامی تقریب میں سعودی عرب کے سفیر نواف سعید المالکی اور اعلیٰ عسکری حکام نے شرکت کی اور مشقوں کے آخری دن کی مختلف سرگرمیوں کا مشاہدہ کیا۔
مشقوں کی اختتامی تقریب میں دونوں ممالک کی خصوصی فورسز کے دستوں سمیت کامبیٹ ایوی ایشن نے اپنی پیشہ وارانہ مہارت کا مظاہرہ کیا۔ تقریب کا اختتام فلائی پاسٹ کے ساتھ ہوا۔
دو ہفتے تک جاری رہنے والی مشقوں کا آغاز 22 اگست کو ہوا۔ اس مشق کا مقصد دونوں برادر ممالک کے درمیان تاریخی عسکری تعلقات کو مزید مضبوط کرنا تھا، جس میں انسداد دہشت گردی کے خلاف مشترکہ آپریشنز سمیت مستقبل میں فوجی تعاون اور تجربات کا تبادلہ شامل ہیں۔