پاکستان اور سعودی عرب نےعلاقائی استحکام اور خوشحالی کے لیے باہمی اقتصادی شراکت داری کی خواہش کااعادہ کیا ہے۔
وزارت خزانہ کی جانب سے جاری پریس ریلیز کے مطابق نگراں وزیر خزانہ ڈاکٹرشمشاداختراور پاکستان میں سعودی عرب کے سفیرنواف بن سعید المالکی کے درمیان ملاقات میں اتفاق کیا گیا کہ پاکستان اور سعودی عرب علاقائی استحکام اور خوشحالی کے لیے باہمی اقتصادی شراکت داری قائم کریں گے۔
اس سے قبل سعودی سفیر نواف بن سعید المالکی نگراں وزیر خزانہ ڈاکٹر شمشاد اختر سے ملاقات کے لیے پہنچے تو انہوں نے سعودی سفیر کا پرتپاک خیر مقدم کیا۔ نگراں وزیر خزانہ نے پاکستان اور سعودی عرب کے درمیان دیرینہ تاریخی، مذہبی اور ثقافتی تعلقات کو سراہا اور سعودی سفیر کو معاشی خوشحالی کے لیے پالیسیوں کے تسلسل سے آگاہ کیا۔
مزید پڑھیں
سعودی سفیر نواف بن سعید المالکی نے دونوں ملکوں کے درمیان دیرینہ تعلقات مزید مضبوط بنانے کے عزم کا اظہار کیا۔ انہوں نے کہا کہ سعودی عرب پاکستان میں سرمایہ کاری کے مواقع سے فائدہ اٹھانے کے لیے تیار ہے اورپاکستان کے ساتھ دوطرفہ اقتصادی اور تجارتی تعلقات کو مزید گہرا کیا جائے گا۔
ملاقات میں باہمی اقتصادی تعلقات مضبوط بنانے کے لیے ٹھوس اقدامات پر اتفاق کیا گیا۔ نگراں وزیر خزانہ نے پاکستان کی مسلسل حمایت پر سعودی قیادت کا شکریہ ادا کیا۔
