چوہدری سرور نے معیشت کی بحالی کے لیے بڑا مطالبہ کر دیا

سابق گورنر پنجاب و چیف آرگنائزر پاکستان مسلم لیگ (ق) چوہدری سرور کا معیشت کی بحالی کے لیے بڑا مطالبہ سامنے آگیا۔

سابق گورنر پنجاب چوہدری سرور نے کہا ہے کہ کالے دھن کی ذخیرہ اندوزی کو ختم کرنے کے لیے فوری طور پر 5 ہزار روپے کے نوٹوں کو منسوخ کیا جائے، منصفانہ نظام قائم نہ کیا گیا تو پاکستان میں بھی انقلاب فرانس کی طرح کے ایک پُرتشدد انقلاب کا خطرہ پیدا ہوسکتا ہے۔

گلاسکو ویلفئیر سوسائٹی اسکاٹ لینڈ کے صدر چوہدری حنیف کی طرف سے دیے گئے ظہرانے سے خطاب کرتے ہوئے چوہدری سرور نے کہاکہ خیبرپختونخوا اور بلوچستان میں ہونے والی مختلف اشیا کی اسمگلنگ کو ختم کرنے کے لیے سخت ایکشن لیا جائے۔

چوہدری سرور نے کہاکہ پاکستان اس وقت تاریخ کے نازک ترین دور سے گزر رہا ہے۔ صورتحال کو بہتر بنانے کے لیے چند سخت ترین اقدامات ناگزیر ہیں۔ پاکستان کو صحیح معنوں میں بلاتفریق سخت احتساب کی ضرورت ہے۔ وفاداریاں تبدیل کرنے والوں کو پاک صاف نہیں قراردیا جانا چاہیے۔

انہوں نے کہاکہ پاکستان کے 80 فیصد وسائل پر ایک محدود اشرافیہ قابض ہے۔ غریب آدمی روٹی نہ ملنے کے باعث خودکشی پر مجبور ہے۔

چوہدری سرور نے کہاکہ منصفانہ نظام کے نفاذ سے غریب امیر کا فرق مٹ سکتا ہے اور عام عوام کو ان کے حقوق میسر آسکتے ہیں۔