پاکستان تحریک انصاف (پی ٹی آئی) کے صدر چوہدری پرویز الٰہی کو مالی بے ضابطگی کے کیس میں رہائی کے بعد ایک اور کیس میں گرفتار کر لیا گیا ہے۔
اینٹی کرپشن حکام کی جانب سے پرویز الٰہی کو لاہور میں جوڈیشل مجسٹریٹ کے سامنے پیش کیا گیا، عدالت نے دلائل سننے کے بعد سابق وزیراعلیٰ کی رہائی کا حکم دے دیا تاہم راولپنڈی پولیس نے انہیں دوسرے کیس گرفتار کر لیا۔
پرویزالٰہی کی پیشی کے موقع پر کمپلیکس میں سخت سیکیورٹی انتظامات کیے گئے تھے، 3 ایس پیز سمیت 500 اہلکار ڈیوٹی سرانجام دیتے رہے۔
مزید پڑھیں
جوڈیشل مجسٹریٹ ریحان الحسن نے اینٹی کرپشن کی پرویزالٰہی کی جسمانی ریمانڈ کی درخواست پر سماعت کی۔
پرویز الہیٰ کے جانب سے صدر لاہور بار رانا انتظار نے عدالت میں دلائل دیتے ہوئے کہا کہ انکوائری سے قبل ایف آئی آر درج نہیں ہوسکتی، کل ڈی جی اینٹی کرپشن کے خلاف توہین عدالت کی درخواست دائر کریں گے۔
وکیل رانا انتظار نے موقف پیش کیا کہ پرویز الٰہی کی گرفتاری بدنیتی پر مبنی ہے، ان کے خلاف انکوائری کی گئی، نہ ہی انکوائری کا نوٹس بھیجا گیا، عدالت سابق وزیراعلیٰ کو مقدمے سے ڈسچارج کرے۔
عدالت نے دلائل سننے کے بعد پرویز الہی کو رہا کرنے کا حکم دے دیا تاہم عدالت میں ہی کھڑی راولپنڈی پولیس نے انہیں دوبارہ گرفتار کیا اور لاہور سے لے کر روانہ ہوگئی۔
پرویز الٰہی کے وکیل رانا انتظار نے کہاکہ عدالت نے اینٹی کرپشن مقدمے میں پرویزالٰہی کو رہا کردیا تھا، لیکن راولپنڈی پولیس دہشت گردی کے مقدمے میں گرفتار کرکے اڈیالہ جیل لے گئی ہے۔
واضح رہے کہ گزشتہ روز انسداد دہشت گردی عدالت اسلام آباد نے جوڈیشل کمپلیکس توڑ پھوڑ کیس میں سابق وزیراعلیٰ پنجاب پرویز الہیٰ کی ضمانت منظور کی تھی، تاہم اینٹی کرپشن نے پرویزالٰہی کو اڈیالہ جیل راولپنڈی سے رہا ہوتے ہی لاہور ماسٹر پلان کرپشن کیس میں گرفتار کرلیا تھا اور انہیں ایک روزہ راہداری ریمانڈ لے کر لاہور منتقل کر دیا تھا۔
