ایک ایسے وقت کہ جب بالی وڈ کو بھی تہواروں کے جوش و خروش نے اپنی گرفت میں لیا ہوا ہے تقریباً 4 سالوں سے بڑی اسکرین سے غائب مایہ ناز اداکار گووندا کا کہنا ہے کہ وہ گزشتہ برس ایک ارب روپے مالیت کے مختلف فلموں کے منصوبے سائن کرنے سے انکار کرچکے ہیں۔
اپنے خاندان کے ساتھ گنیش چتورتھی منانے والے اداکار نے میڈیا سے بات چیت کرتے ہوئے کہا کہ انہوں نے گزشتہ سال 100 کروڑ روپے کے منصوبوں کو مسترد کرنا پڑا کیونکہ انہیں پیش کیے گئے کردار ’بے ترتیب‘ تھے۔
گووندا 12 مرتبہ فلم فیئر ایوارڈ کے لیے نامزد ہوچکے ہیں تاہم وہ 2 فلم فیئر اسپیشل ایوارڈ سمیت بہترین کامیڈین کا فلم فیئر ایوارڈ جیت چکے ہیں۔ حال ہی میں انہوں نے اپنی بیوی سنیتا اور بیٹے یشوردھن کے ہمراہ اداکارہ شلپا شیٹی کندرا کے گھر پر منعقدہ گنیش چتورتھی کی تقریبات میں بھی شرکت کی۔
قلی نمبر 1 سے شہرت کی بلندی پر پہنچنے والے 59 سالہ اداکار کا کہنا تھا کہ وہ آسانی سے کام قبول نہیں کرتے لیکن جو لوگ سمجھتے ہیں کہ انہیں کام نہیں مل رہا، وہ انہیں بتانا چاہیں گے کہ ‘مجھے کرپا ہے باپا کی’۔ ’میں نے پچھلے سال 100 کروڑ روپے کے فلمی منصوبوں کو مسترد کیا تھا۔‘
گووندا کے مطابق وہ کسی بھی پر کشش فلمی منصوبے پر راضی نہ ہونے کے باعث ایک طرح کے پچھتاوے کو بھی محسوس کررہے تھے۔ ’وہ بہت سارے پیسوں کی پیشکش کر رہے تھے لیکن میں کوئی بے ترتیب عام سا کردار نہیں کرنا چاہتا تھا۔ میں کچھ ایسا کرنا چاہتا ہوں جو میں نے ماضی میں کیا ہے، اس سطح کی کوئی چیز۔‘
170 سے زیادہ فلموں میں اداکاری کرنے والے گووندا ارون آہوجہ نے 1986 میں اپنے فلمی کریئر کا آغاز کیا تھا۔ وہ ہیرو نمبر 1، دلہے راجہ، شعلہ اور شبنم اور پارٹنر جیسی ہٹ فلموں کا حصہ رہے ہیں۔ جسمانی مزاح اور ڈانس میں ماہر گووندا آخری بار فلم رنگیلا راجہ میں نظر آئے تھے، جو 2019 میں ریلیز ہوئی تھی۔
حال ہی میں غدر 2 کی اداکارہ امیشا پٹیل نے انکشاف کیا تھا کہ اصل فلم ’غدر: ایک پریم کتھا‘ میں مرکزی کردار کے لیے گووندا پہلا انتخاب تھے، تاہم ہدایت کار انیل شرما نے ایک انٹرویو میں اس دعوے کو مسترد کرتے ہوئے بتایا ہے کہ مذکورہ فلم کے لیے گووندا انتخاب نہیں تھے۔
’میں نے ان کے ساتھ مہاراجہ نامی فلم کی تھی۔ ایک روز میں انہیں غدر کی کہانی سنا رہا تھا تو انہوں نے مجھ سے کہا کہ وہ یہ فلم نہیں کر سکتے۔ شاید وہ سمجھے کہ میں انہیں فلم کی کہانی اس لیے سنارہا ہوں کیونکہ میں انہیں کاسٹ کرنا چاہتا ہوں۔‘
