لاہور سیشن کورٹ: بیٹی سے زیادتی کرنے والے باپ کو سزائے موت کا حکم

لاہور کی سیشن کورٹ نے 14 سال کی سگی بیٹی کو زیادتی کا نشانہ بنانے کے جرم میں سزائے موت کا حکم سنا دیا، عدالت نے اپنے تحریری فیصلے میں تحریر کیا کہ باپ ہمیشہ بچوں کا محافظ تصور کیا جاتا ہے۔

لاہور سیشن کورٹ کے ایڈیشنل سیشن جج میاں شاہد جاوید نے ٹرائل مکمل ہونے پر زیادتی کیس کا فیصلہ سنایا، عدالت نے جرم ثابت ہونے پر زیادتی کرنے والے باپ رفیق کو 10 لاکھ جرمانہ بھی عائد کیا۔

عدالت نے تحریری فیصلے میں لکھاکہ باپ کو ہمیشہ بچوں کا محافظ تصور کیا جاتا ہے۔ اگر بیٹی کو کوئی باہر تنگ کرے تو وہ اپنے والد کو محافظ سمجھتے ہوئے شکایت کرتی ہے۔

موجودہ کیس میں سگے باپ نے اپنی بیٹی کی شخصیت، روح اور جسم کو تباہ کیا۔ کمسن بچی ذہنی اذیت کا بھی شکار ہوئی دوران ٹرائل پراسکیوشن نے 11 گواہ عدالت میں پیش کیے۔

عدالت نے کہا کہ پراسیکیوشن اپنا کیس ثابت کرنے میں کامیاب ہوئی ہے، والد کو اپنی سگی بیٹی سے زیادتی کے جرم میں سزائے موت کا حکم سنایا جاتا ہے۔

مجرم رفیق کے خلاف تھانہ ستوکتلہ پولیس نے 2019 میں مقدمہ درج کیا تھا۔ عدالت نے سزائے موت کے فیصلے کے بعد مجرم کو کوٹ لکھپت جیل بھیج دیا۔