فیض آباد دھرنا کیس: کیا ریویو میں فیصلہ بدل سکتا ہے؟

موجودہ چیف جسٹس، جسٹس قاضی فائز عیسٰی نے تحریک لبیک پاکستان کی جانب سے فیض آباد دھرنا کیس میں فروری 2019 میں ایک حکم نامہ جاری کیا جس میں کہا گیا تھا کہ جن فوجی اہلکاروں نے اپنے حلف کی خلاف ورزی کرتے ہوئے سیاسی سرگرمیوں میں حصہ لیا ان کے خلاف کارروائی کی جائے۔

چیف جسٹس، جسٹس قاضی فائز عیسٰی نے یہ فیصلہ بینچ کے جونیئر رکن کے طور پر تحریر کیا تھا جبکہ سینیئر رکن جسٹس مشیر عالم تھے۔ اکثریت مبصرین کا کہنا ہے کہ یہی فیصلہ جسٹس قاضی فائز عیسٰی کے خلاف ریفرنس کی بنیاد بنا۔

اب 28 ستمبر کو اس فیصلے کے خلاف نظرثانی درخواست سماعت کے لیے مقرر ہو گئی ہے جس کی سماعت جسٹس قاضی فائز عیسٰی کی سربراہی میں جسٹس امین الدین خان، اور جسٹس اطہر من اللہ پر مشتمل بینچ کرے گا۔

کیا ریویو میں فیصلہ بدل سکتا ہے؟

سپریم کورٹ کے موجودہ رولز کے مطابق نظرثانی درخواست کا اسکوپ بہت محدود ہوتا ہے اور نظر ثانی درخواست کی سماعت وہی ججز کر سکتے ہیں جنہوں نے پہلے والی درخواست کی سماعت کی ہو۔ جسٹس مشیر عالم چونکہ ریٹائر ہو چکے ہیں اس لیے وہ اس بینچ میں شامل نہیں البتہ بینچ 2 رکنی سے 3 رکنی بن چکا ہے لیکن نظرثانی درخواست میں درخواست گزار صرف اس بات کی نشاندہی کر سکتا ہے کہ سپریم کورٹ کے پہلے والے فیصلے میں نقائص کیا تھے، اس کے علاوہ درخواست گزار نظر ثانی درخواست میں نئی وجوہات شامل نہیں کر سکتا اور عمومی طور پر دیکھا گیا ہے کہ نظر ثانی درخواستیں اکثر مسترد ہو جاتی ہیں اور اصل فیصلہ ہی برقرار رہتا ہے۔

فیض آباد دھرنا کیس میں درخواست گزار کون ہیں؟

فیض آباد دھرنا کیس میں فیصلے کے خلاف پاکستان تحریک انصاف، شیخ رشید احمد، اعجاز الحق، انٹیلی جنس بیورو، وزارت دفاع، الیکشن کمیشن آف پاکستان، پیمرا اور ایم کیو ایم سمیت 8 فریقین نے نظر ثانی درخواستیں دائر کی ہوئی ہیں۔

فیصلے سے پاک فوج کے مورال پر اثر پڑا ہے

وزارت دفاع کی نظر ثانی درخواست جو اس وقت کے اٹارنی جنرل انور منصور نے تیار کی تھی، اس میں عدالت سے درخواست کی گئی تھی کہ فیصلے میں افواج پاکستان اور آئی ایس آئی کے خلاف جو ریمارکس دیے گئے ہیں ان کو حذف کیا جائے کیونکہ اس فیصلے سے افواج پاکستان کے مورال پر اثر پڑا ہے۔ وزارت دفاع کی نظر ثانی درخواست میں کہا گیا ہے کہ عدالت کے سامنے کوئی ایسا ثبوت نہیں جس کی بناء پر یہ کہا گیا ہے کہ افواج پاکستان یا آئی ایس آئی 2017 میں تحریک لبیک پاکستان کے دھرنا، 2018 انتخابات کے مخصوص نتائج یا میڈیا سینسرشپ میں ملوث ہے۔

انٹیلی جنس ادارے آئی بی نے بھی اپنی نظرثانی درخواست میں یہی موقف اپنایا ہے کہ سپریم کورٹ فیصلے میں ان کی سیاست میں مداخلت اور غیر قانونی سرگرمیوں کے بارے میں جو بات کی گئی ہے اس سے ان کا قومی تاثر ہوا ہے۔

پاکستان تحریک انصاف نے اپنی نظر ثانی درخواست میں موقف اپنایا ہے کہ فیض آباد دھرنا کیس میں جہاں پاکستان تحریک انصاف اور پاکستان عوامی تحریک کے 2014 کے دھرنے کا ذکر کیا گیا ہے، اس سے یہ تاثر ابھرتا ہے گویا 2014 کا دھرنا غیرقانونی اور بنیادی حقوق کے خلاف تھا اور اس کا مقصد صرف ایک تشہیر تھا۔ پی ٹی آئی نے اپنے سیکریٹری جنرل ارشد داد کے ذریعے درخواست میں موقف اپنایا ہے کہ ان کا سنہ 2017 فیض آباد دھرنے سے کوئی تعلق نہیں اس لیے ان کے بارے میں ریمارکس کو حذف کیا جائے۔

فیض آباد دھرنا کیس کے فیصلے میں کیا کہا گیا تھا؟

اس فیصلے کا مرکزی نقطہ جس میں کہا گیا ہے کہ وفاقی حکومت اور افواج پاکستان اپنے حلف کی خلاف ورزی کر کے سیاسی سرگرمیوں میں حصہ لینے والے فوجی افسران کے خلاف کارروائی کریں۔ اس کے علاوہ اس فیصلے میں کہا گیا کہ احتجاج ایک جمہوری حق ہے لیکن اس وقت تک کہ جب دوسرے لوگوں کے بنیادی حقوق متاثر نہ ہوں۔

احتجاج کرنے والے وہ افراد جو لوگوں کا راستہ روکتے ہیں، ان کی املاک پر حملے کرتے ہیں ان کے خلاف قانون کے مطابق کارروائی کی جائے، تحریک لبیک پاکستان کے بارے میں اس فیصلے میں الیکشن کمیشن آف پاکستان کو ہدایات جاری کی گئیں کہ اگر مذکورہ جماعت انتخابی قوانین پر عمل درآمد نہیں کرتی تو ان کے خلاف کارروائی کی جائے، تمام سیاسی جماعتیں اپنے فنڈز کے ذرائع بتانے کی پابند ہیں، جب 12 مئی 2007 کو کراچی میں قتل و غارت کرنے والوں کو سزا نہ دی گئی تو اس سے دوسروں کو حوصلہ ملا۔