پاکستان مسلم لیگ ن کے صدر و سابق وزیراعظم شہباز شریف نے کہا ہے کہ نواز شریف 21 اکتوبر کو وطن واپس پہنچیں گے، مسلم لیگی رہنما اور کارکنان اپنے قائد کے فقید المثال استقبال کی تیاریاں کریں۔
لندن میں صحافیوں سے گفتگو کرتے ہوئے شہباز شریف نے کہاکہ نواز شریف کے دور میں پاکستان میں تعمیرو ترقی ہوئی، اُس وقت مہنگائی کم ترین سطح پر تھی، بجلی کی 20 ،20 گھنٹے کی لوڈشیڈنگ سے قوم کو نجات دلائی۔
مزید پڑھیں
شہباز شریف نے کہاکہ نواز شریف کے دور میں سرمایہ کاری ہوئی، سی پیک کے منصوبے پر کام شروع ہوا اور صنعتوں کا پہیہ چلا۔
صحافی کا سوال کہ آئندہ عام انتخابات میں مسلم لیگ ن کا بیانیہ کیا ہو گا؟ کے جواب میں شہباز شریف نے کہاکہ نواز شریف کے دور میں ترقی کا سفر جہاں سے رکا تھا وہیں دوبارہ شروع ہو گا اور نواز شریف اسی لیے وطن واپس جا رہے ہیں۔
سابق وزیراعظم نے کہاکہ مسلم لیگ ن کے دور میں ملک ترقی کر رہا تھا اور جی ڈی پی ساڑھے 6 فیصد تھی۔
انہوں نے ہدایت کی کہ نوازشریف ہفتہ 21 اکتوبرکوپاکستان جائیں گے لہٰذا تمام پارٹی رہنما 21 اکتوبر سے قبل بیرون ملک سفر نہ کریں۔
واضح رہے کہ سابق وزیراعظم نواز شریف نے 21 اکتوبر کو وطن واپسی کا اعلان کر رکھا ہے جس کے لیے مسلم لیگ ن کی تیاریاں عروج پر ہیں۔
دوسری جانب الیکشن کمیشن آف پاکستان نے جنوری کے آخری ہفتے میں انتخابات کرانے کا بھی اعلان کر دیا ہے۔
نواز شریف کی وطن واپسی کے بعد صورت حال واضح ہو گی کہ آئندہ عام انتخابات میں مسلم لیگ ن کا بیانیہ کیا ہوگا کیوں کہ اس میں کوئی دو رائے نہیں کہ نواز شریف اینٹی اسٹیبلشمنٹ جبکہ شہباز شریف اسٹیبلشمنٹ کے ساتھ مل کر چلنے کے حامی ہیں۔