ڈالر کی بلیک مارکیٹنگ کے خلاف حکومتی کریک ڈاؤن جاری ہے جس کے باعث روپے کی قدر ڈالر کے مقابلے میں مزید بہتر ہوئی ہے۔
کاروباری دن کے اختتام پر انٹربیبک میں ڈالر ایک روپے 6 پیسے سستا ہوگیا۔ انٹربینک میں ڈالر 290.86 پیسے سے کم ہوکر 289.80 پیسے کا ہوگیا۔
اوپن مارکیٹ میں بھی ڈالر ایک روپے سستا ہو کر 292 روپے کا ہوگیا ہے۔ گزشتہ روز اوپن مارکیٹ میں روپے کے مقابلے میں ڈالر 293 روپے کا تھا۔
معاشی ماہر شہریار بٹ نے کرنسی اور اسٹاک مارکیٹ کے حوالے سے وی نیوز کو اپنی رائے دیتے ہوئے کہا کہ اس وقت ڈالر کے ساتھ ساتھ اسٹاک مارکیٹ سے بھی مثبت خبریں آرہی ہیں۔ انہوں نے مزید کہا کہ حکومت کا کریک ڈاون آج بھی جاری رہا جب کہ پاکستان اسٹاک ایکسچینج میں آج تیزی کا رجحان ہے۔
جنرل سیکریٹری ایکسچینج کمپنیز ایسوسی ایشن آف پاکستان ظفر پراچہ کے مطابق ڈالر بہت اونچائی سے نیچے آگرا ہے جس کی واحد وجہ یہ ہے کہ اس بار سنجیدگی سے آپریشن جاری ہے۔
ظفر پراچہ نے بتایا کہ روزانہ کی بنیاد پر ڈالر نیچے آرہا ہے اب یہ کہاں جا کر رکے گا اس کا تعلق ہماری مستقل مزاجی سے ہے اگر غیر قانونی دھندوں اور بلیک مارکیٹ کے خلاف ایسے ہی آپریشن جاری رہا تو ڈالر 250 روپے تک آسکتا ہے۔
