امریکی نمائندہ خصوصی برائے افغانستان تھامس ویسٹ نے تحریک طالبان پاکستان (ٹی ٹی پی) کی پاکستان میں دہشتگرد کارروائیوں پر پاکستان کے موقف کی تائید کرتے ہوئے کہاکہ ٹی ٹی پی خطے میں امن کے لیے خطرہ ہے۔
امریکا کے خصوصی نمائندہ برائے افغانستان تھامس ویسٹ نے کہاکہ پاکستان میں ٹی ٹی پی کی جانب سے افغان سرزمین کو استعمال کرکے حملوں میں اضافہ دیکھنے میں آیا ہے۔ افغان طالبان ٹی ٹی پی کو لاجسٹک سپورٹ بھی فراہم کرتے آئے ہیں۔
مزید پڑھیں
تھامس ویسٹ ڈپٹی اسسٹنٹ سیکرٹری بیورو آف ساؤتھ اینڈ سنٹرل ایشین افیئرز بھی ہیں، امن مشنز کے لیے عالمی سطح پر تھامس ویسٹ کی خدمات قابل قدر ہیں۔ انہوں نے سٹمسن سنٹر میں ہونے والے سیمینار میں اظہار خیال کرتے ہوئے ٹی ٹی پی کی کارروائیوں پر پاکستانی موقف کی تائید کی۔
انہوں نے کہاکہ جو بھی اس خطے کو جانتا ہے وہ اس بات سے واقف ہے کہ ٹی ٹی پی پاکستان سے نکالے جانے پر افغان طالبان کی حامی بن کر جنگ لڑتی رہی، افغان طالبان اور ٹی ٹی پی آپریشنل اور مالی معاونت میں ایک پیج پر ہیں۔
تھامس ویسٹ کا کہنا ہے کہ پاکستان خطے میں امن کے لیے ہمیشہ مددگار رہا ہے، انہوں نے خطے میں امن کے لیے پاکستان کی کاوشوں کی تعریف کی۔
ان کا کہنا تھا کہ پاکستان سیکیورٹی مسائل کی نشاندہی اور افغان مہاجرین کے معاملے پر انتہائی مددگار رہا ہے۔