وفاقی وزیر مذہبی امور انیق احمد نے پاکستان میں تعینات سعودی سفیر نواف سعید المالکی اور رابطہ عالم اسلامی کے ریجنل ڈائریکٹر سعد الحارثی سے ملاقات کی ہے۔
وزیر مذہبی امور انیق احمد نے حج انتظامات پر سعودی حکومت کا شکریہ ادا کیا، ملاقات میں باہمی دلچسپی کے امور پر تبادلہ خیال کیا گیا۔
روڈ ٹو مکہ پراجیکٹ میں کراچی کو شامل کر لیا گیا، وزیرمذہبی امور
وزیر مذہبی امور انیق احمد نے کہاکہ میرا حالیہ دورہ سعودی عرب انتہائی کامیاب رہا۔ رواں برس پاکستانی عازمین حج کو پہلے سے بہتر سہولتیں فراہم کریں گے۔ کراچی کو روڈ ٹو مکہ پراجیکٹ میں شامل کر لیا گیا ہے۔ اب کراچی سے روانہ ہونے والے عازمینِ حج کی سعودی امیگریشن اور کسٹم پاکستان میں ہی ممکن ہو سکےگا۔
انیق احمد نے کہاکہ اسلام آباد میں مجوزہ سیرت میوزیم کا قیام ایک انقلابی قدم ہو گا۔ سیکرٹری جنرل رابطہ عالم اسلامی ڈاکٹر عبد الکریم العیسیٰ 15 نومبر کو سیرت میوزیم کا سنگ بنیاد رکھیں گے۔ رابطہ عالم اسلامی انتہائی متحرک اور فعال کردار ادار کر رہی ہے۔
روڈ ٹو مکہ پراجیکٹ میں شامل ملکوں میں پاکستان سرفہرست ہے، سعودی سفیر
اس موقع پر سعودی سفیر نواف سعید المالکی نے کہاکہ آنے والے حج کے دوران عازمین کی سہولتوں میں مزید اضافہ کیا جائے گا۔ دنیا بھر سے صرف 7 ممالک کو روڈ ٹو مکہ پراجیکٹ میں شامل کیا گیا ہے اور پاکستان ان اولین ممالک میں شامل ہے۔
ریجنل ڈائریکٹر رابطہ عالم اسلامی سعد الحارثی نے بتایا کہ سیرت میوزیم اسلام آباد میں 8 ہزار اسکوائر میٹر رقبے پر تعمیر کیا جائے گا، اگلے ماہ اس کے سنگ بنیاد اور بروقت تعمیر کے لیے اقدامات کیے جا رہے ہیں۔
